Өйткені елде жаппай тексеру басталды. Салдарынан бір ғана Түркістан облысының өзінде 2-3 күннен бері 465 автомобиль айып тұрағына жабылған. Ай мен күннің аманында астындағы тұлпарынан айрылған азаматтар ашуға булығып отыр. Толығырақ Алтынбек Әмит тарқатады.
https://www.youtube.com/watch?v=sSCTCEYQ5qA
Әлішер Төлегеновтің көлігін күні кеше ғана ешқандай жол ережесін бұзбаса да, тәртіп сақшылары айыптұраққа алып кеткен. Айтуынша көлігі Ресей елінің тізімінен шығарылған. Алайда ол туралы хабарсыз болған көрінеді. Мырзахметті ашындырған сол, есептен шығарылғаны туралы полиция қызметкерлерінің алдын ала ескертпегендігі.
Әлішер Төлегенов, жүргізуші:
«Ресейлік көліктер біздікілерден қарағанда, 300-400 мың теңге арзан. Егер ол көліктердің жүруіне тыйым салатын болса, отандық көліктердің бағасын арзандатсын. Әйтпесе, халықтың көзінен жас емес, қан ағады. Соны ескеріңіздер».
Ал полицейлер ереженің қолданысқа енгенін айтып, дабыл қағып жүргенімізге жылдан асты дейді. Айтуларынша, елге сенімхат арқылы кіргізілген көліктер Қазақстан аумағында бір жыл еркін жүре алады. Содан соң мерзімі аяқталғаннан кейін 30 күн ішінде елден шығару немесе отандық есепке тіркеу керек. Ал кешелі бері айыптұраққа жөнелтілген көліктер бұл ережені белден басқан.
Алмас Тастанбеков, облыстық ПД Әкімшілік полиция басқармасының басшысы:
«Қазақстанда рәсімделген қолданыстағы АҚЖ МС сақтандыру полисі. РФ аумағында өткен техникалық байқаудың қолданыстағы куәлігі. Бұл үшін жыл сайын Ресейге бару қажет болады. Заңға сәйкес халықаралық қозғалысқа қатысуға шыққан жылына қарамастан, тек жыл сайынғы техникалық тексерістен өткен көліктер ғана жіберіледі».
Елімізде Ресей Федерациясының Ішкі істер министрлігінде тіркелмеген 88 мың автокөлік бар екен. Яғни, олар белгіленген тәртіпте тіркелмеген немесе сатылған. Оның ішінде 12 мыңнан астамы Түркістан облысында жүр.
Ерлан Тұрғымбаев, ҚР Ішкі істер министрі:
«Елімізде жүрген 88 мыңға жуық ресей автокөліктің техникалық құжаты жоқ. Теміртұлпарлардың жарамдылығы туралы да ешқандай министрлік білмейді. Сондықтан оқыс оқиғалардың алдын-алу мақсатында жүргізушілерге түсіндірме жұмыстары жүргізілуде. Әрбір көлік иесі ресейлік немесе қазақстандық техникалық байқаудан өтуі тиіс. Өйтпеген жағдайда, олардың қозғалысына тыйым салынады».
Түйін: Алдағы уақытта ресейлік көліктердің тағдыры қалай болары белгісіз. Бейресми ақпараттарға сенсек, Қазақстан сатып алуға оқталып тұрған Ресей елінің «Сбер» платформасы іске қосылса, бұл мәселенің барлығы шешілуі мүмкін. Сонда ғана көрші елдің нөмерін таққан көліктер көшелерде емін-еркін жүре алады.
