Түркістандық полицей ерекше істі жанына серік етіп жүр. Ол өз үйінің шатырын шағын музейге айналдырған. Коллекция қорында кеңестік заманнан қалған көне заттардың түр-түрі бар. Сайрамдық пагонды азамат болашақта мұражайын кеңейтіп, құжаттандыруды көздейді.
Сухраб Ирназаров – ширек ғасырлық ғұмырын полицияға арнаған жан. Бала күнінен ескі жәдігерлерді жинаумен әуестенген ол 2014 жылы бұл ісін тиянақтай түскен. Қазірде өзі жасақтаған музейде мыңға жуық ескі монеталар мен өткен ғасырдағы тұрмыстық техника, телефондар мен тігін машиналары бар. Сондай-ақ, фотоаппараттар мен музыкалық аспаптар, радионың 250-ге жуық түрін де көруге болады.
Сухраб Ирназаров, аудан тұрғыны:
– Кейбір заттар болады. Ұнамай қалса, шатырға тастап отырдым. Содан 2-3 жыл өткеннен кейін шатыр толып кетті. Қайтадан жинап полкаларға қойып шыққанмын. Кейбір коллекция мен тақырыбыма қатысы жоқ-ау дегендерін басқа біреумен ауыстырамын.
Мұнда кірсеңіз, Кеңес үкіметі заманына енгендей күй кешесіз. Кейбір келушілер құнды жәдігерлерді сатып алуға да тырасады екен. Әйткенмен, Сухраб Ирназаров ондағы ешбір затты сатуға қимайды.
Сухраб Ирназаров, аудан тұрғыны:
– Негізі осындаймен айналысатынымды онша ешкімге айтқаным жоқ. Әріптестерімнің кейбірі ғана көрген. Онда да бір-екеуі ғана. Былай өзім ашық жария етпегенмін.
Сухраб Ирназаров алдағы уақытта музей қорын толықтыра түспек ниетте. Содан соң ғана құжаттарын рәсімдеп, жалпақ жұртқа есігін айқара ашпақ.
