Ауадағы көмірқышқыл газының мөлшері қайтадан көбейіп кетті. Ғалымдар мұны Қытайда өндіріс орындарының көбейіп кеткенінен көріп отыр. Егер мұны шұғыл қолға алмаса, ақырзаманның ауылы алыс емес. Қазірдің өзінде жағдай мүшкіл: Жер шарында күн күрт ысып, Мұзды мұхиттың көбесі сөгіле бастаған. Глазгодағы климаттық саммит дәл осы мәселеден басталды.
Ғылымдардың зерттеуіне сәйкес, осы 9 ай ішінде 36,4 миллиард тонна климаттың өзгеруіне тікелей әсер ететін көміртек ауаға таралған. Ал, 2019 жылы бұл көрсеткіш 36,7 миллиард тонна болыпты. Мұндай аномальды жоғары көрсеткіштерді ғалымдар Қытайдағы өндіріс көлемінің артуымен байланыстырып отыр.
Коринн Ле Кере, Шығыс Англия университетінің зерттеуші-профессоры:
«Әлем қайтадан климаттық өзгерудің қатерлі кезеңіне аяқ басты. Қытайдағы көмірқышқыл газының көбейіп отырғанын көріп отырмыз. Тіпті, Үндістан да атмосфераға қауіпті газдардың таралуын сәл де болса азайтты. АҚШ пен Еуропа да мысал. Қытай болса, бейберекет экономикалық шараларды арттыруда».
Осыған дейін бірнеше климаттық саммиттерде Ұлыбритания мен Еуропалық Одақ атынан сөйлеген Ямиде Дагнет алдағы 10 күн бүкіл әлем үшін шешуші болады дейді. Ғаламдық минералды ресурстар Институтының жетекші маманы сол 10 күн бойы барлық тараптар үшін қиын болатынын жасырмады. Себебі, алда 104-пункт бойынша келіссөздер күтіп тұр. Осы аралықта елдер келісімге келулері тиіс.
Ямиде Дагнет, Әлемдік минералды ресурстар институтының жетекші маманы:
«Алдыңғы күндері орман ресрустары және метан жайлы бірнеше бастамалар көтерілді. Осы саммитте сол мәселеге нүкте қойылса деген үміттемін. Алпауыт елдер туралы айтсақ, Қытай соңғы бір жарым жылда ешқандай ірі шараға қатыспады. Олардың ел ішіндегі климаттық шаралары бірінші орында емес. Бұл бізді алаңдатады».
2030 жылға дейін орман ағаштарын кесу тоқтатылады. Бұған COP26 климат саммитіне қатысқан 100-ден астам мемлекет басшылары келісім берді. Одан бөлек те мәселелер жеткілікті дейді сарапшылар. Егер Жер шарының жылынуы, Озон қабатының тесілуі, СО2 газының көп мөлшерде бөлінуі секілді жаһандық дағдарыстың алдын алатын күрделі қадамдарға қол жеткізе алса, онда бұл реткі Глазгодағы айтулы жиынның мәнді болғаны.
