Әңгіме Түркістан қаласындағы «Шауғар» ықшамауданы жайлы. Ел тегіс ұйқыда жатқанда белгісіз біреулер көшеге бірнеше мал өлігін тастап кеткен. Содан бері он күн өтсе де, ешкім тазартпаған соң тұрғындар біздің арнамызға шағымданды.
Иістеніп, тіпті құрттай да бастаған өлексеге жақындамақ түгілі, маңайынан өту мүмкін емес. Қолаңса иіс қолқаны қабатыны өз алдына, «балаларға ауру жұға ма» деп қорқып отыр тұрғындар. Себебі ойын алаңы қол созым жерде ғана.
Ғалия Қалдыбекова, қала тұрғыны:
«Мына өлексені әкеліп тастағанына қанша күн болды. 109 ға да, тазалық мекемелеріне де хабарластық, еш нәтиже жоқ. Қасымызда балалар ойын алаңшасы бар, соларға ауру жұға ма деп қорқамыз. Енді бір шара қолдану қажет қой».
Тиісті орындардың ешқайсысынан қайран болмаған соң «шауғарлықтар» ең соңында ветеринарлық қызмет өкілдеріне қоңырау шалған. Сөйтсе олар да: «біз тек қаңғыбас ит пен мысықтың өлексесін ғана тазартамыз», – деп бастарын алып қашқан.
Еркебұлан Есет «Шауғар» ықшамауданының полиция инспекторы:
«Шауғар» ықшамауданы тұрғындары бізге хабарласты. Дегенмен мал өлексесін тазалау біздің құзіретімізге кірмейді. Бірақ мен өзім 109 байланыс орталығына, ветеринарлық орталыққа да хабарластым, ешқайсысы елең еткен жоқ».
Өлексені жұртшылықтың өзі алып тастайын десе, ауру жұға ма деп қорқып отыр. Бұрындары онша-мұншаны елемейтін елде мұндай үрей пандемиядан кейін қалыптасқан. Сондықтан егер қандай да бір мекеме мұны өз мойнына алмаса, оның көшеде әлі қанша жатары белгісіз…
