Елімізде педагог тапшы. Жыл басынан бері 18 мың бос вакансия жарияланған. Бұл туралы Еңбек ресурстарын дамыту орталығы мәлімдеді. Түркістан облысы бұл ретте көш басында. Демек өңірдегі болашақ ұстаздарға мүмкіндік бар. Оқушыларға дәріс оқытамын дегендер қайда? Жұмысқа қалай орналаса алады? Нұрлан Сұлтанбек жауап іздеп көрді
Түркістан облысында 3638 адамға мұғалім болуға мүмкіндік бар. Ұстаздарға вакансия жариялағандардың бірі қаладағы №28 мектеп-лицейі. Биыл ғана жұмысын бастаған білім ошағында орыс тілді педагог тапшы. Бұл салады тәжірибелі ұстаз түгілі, жас маман жоқ, – дейді директор міндетін атқарушы
Ләззат Нысанқұлова, Түркістан қаласы №28 мектеп-лицей КММ директорының міндетін атқарушы:
«Мектеп жұмысын бастағалы бері басты кедергі – орыс сыныптарында маман жетіспеушілігі. Орыс сыныбына беретін бастауыш сыныптарының болмауы. Және күні бүгінге дейінгі орыс тілі пәнінен сабақ беретін мұғалімдердің жетіспеушілігі айқын байқалады. Сондықтан орысша пәндеріне маман табу қиыншылық тудыруда».
Бүгінде тікелей мектеп директоры арқылы жұмысқа орналасу мүмкін емес. Өңірде 2017 жылдан бастап «Jumis Smart Nation» платформасы іске қосылған. Жұмыс іздеген педагогтар арнайы базаға тіркеліп, бос орынға үміткер бола алады. Бұл туралы облыстың адами әлеуетті дамыту басқармасы баяндады. Жаңа бастама бойынша, әр мектеп басшысы арнайы құрылған комиссиямен талабына сай оқытушыны таңдап ала алады.
Азамат Оспанов, Түркістан облысы адами әлеуетті дамыту басқармасы, кадрлық қамтамасыз ету бөлімінің инспекторы:
«Жалпы педагог мамандары үшін арнайы құрылған комиссиялар мен осы тестілер нәтижесі бойынша біз өңірдегі педагог мамандарының білім сапасына дұрыс таңдау жасаймыз. Бұйырса бұл үлкен бастама жалғасын табады деп отырмыз. Үкіметтің өзі қолдау көрсеткен бұл жобаның болашағы жарқын. Өңірдегі сапалы педагогтарды таңдауға үлкен септігін тигізеді деген ойдамыз»
Түркістан облысының білім саласына қажетті вакансиялар тізбегі мынадай: ағылшын тілі мамандарына 773 орын бос. 720-ға жуық орыс тілі әдебиеті пәні мұғалімі керек. Ал 429 бос жұмыс орны математиктерді күтіп тұр. Сонымен қатар, білікті мамандар арасында түйіндеме мен бос жұмыс орындарын салыстыру кезінде 8 мыңға жуық интервьюер іздеген. Бұдан бөлек, 2300 күзетші мен 2000 автокөлік жүргізушісі жетіспейді.
