Қаладағы «Отырар» шағынауданы тұрғындары «нәжістің астында қалдық» деп дабыл қағуда. Салынғанына небәрі 3 жыл болған көпқабатты тұрғын үйлердің кәріз құбырлары апта сайын жарылып кете береді екен. Сапасыз құрылысты мердігер мекеме өз жауапкершілігіне алудан бас тартты. Ал, әкімдік не дейді? Мәселенің мән-жайын Алтынбек Әмит анықтады.
Қуандық Мырзағалиұлы, қала тұрғыны:
«№12 үйдің астында қайт-қайта тасқын боп жатыр. Себебі сырттан қара құбыр шыққан, оған апарған да ақ құбырды жамап қойған, оны скточпен орап қойған. Одан кейін сыртқа шыққан жағы көтеріңкі де, іш жағы төмен. Арғы жағы сәл кептелсе, бергі жақ түгел бітеледі».
Көпқабатты тұрғын үйлер жертөлесіндегі құбырлардың әбден тозығы жеткен. Тіпті
темір бекітпенің орнына мынандай арзан скотч пайдаланылған. Тұрғындардың сөзіне сенсек, жертөле бұған дейін де бірнеше рет толса керек. Онда да әркім өзі қолынан келгенше тазалап, жабулы қазан жабулы күйінде қалдыра салған, яғни әкімдік тарапынан қайран болмаған.
Бақтиар Бердібаев, «Түркістан қызмет сервис» мекемесінің басшысы:
«Кәріздік сорғы станциясы» моторының өшуіне байланысты су жертөлеге жиналып жатыр. Осы құбыр арқылы. Мұның себебін мынау Тұрғын үй, құрылыс бөлімі «Тұрғын үй-коммуналдық шаруашылық» мекемесіне өткізуі керек. Одан кейін энергетикаға жету керек. Сонда ғана электр жарығы келіп, бәрі дұрыс болады».
Халықты ашындырған мәселе бойынша қала әкімдігіне бір емес, бірнеше мәрте хабарласып, оқиға орынына шақырып көрдік. Алайда ешқандай атқамінер бой көрсете қоймады. Болмаған соң шенеуніктерді өзіміз іздеп бардық. Сондағы алған жауабымыз:
Алмас Байжанов, қалалық құрылыс бөлімі басшысының орынбасары:
«Бұл нысан бойынша толыққанды жұмыстар жүргізіп жатырмыз. Қажетті электр құрылғыларды алып бергенбіз. Жобаға сай құрылыс жұмыстары жүргізілген. Ал жертөледегі мәселе бойынша «Түркістан Су» мекемесімен келіссөздер жүріп жатыр. Ал кеткен ақаулықтар түгелдей мердігердің есебінен жөнделетін болады».
Түйін: Осылайша атқамінер жылдан аса жауабы табылмай келген мәселені бір аптаның ішінде шешеміз деп сендірді. Дегенмен ол «кәріз жүйесінің дұрыс істемеуі мердігер компанияның кінәсі» деп өздеріне шаң жуытпады.
