Елбасы Нұрсұлтан Назарбаевтың Жарлығымен 2013 жылдан бері дәстүрлі түрде өтіп келе жатқан «Мерейлі отбасы – 2021» ұлттық байқауы биылғы жылы 7-ші рет ұйымдастырылды. Бүгін Түркістан қаласында аталмыш байқаудың облыстық кезеңінде топ жарған жеңімпаздарды марапаттау рәсімі болып өтті.
«Мерейлі отбасы» байқауының облыстық кезеңінде биыл Қазығұрт ауданы, Шарбұлақ ауылының тұрғындары Жамаловтар отбасы үлгілі деп танылып, бас жүлдені иеленді. 2-орын Түркістан қаласының тұрғындары Усербаевтар отбасына бұйырды. Байқау жеңімпаздарына арнайы дипломдар мен қаржылай сыйлықтар табыс етілді.
Облыс әкімінің орынбасары Сәкен Қалқаманов жеңімпаздарды құттықтап, байқауға қатысқан барлық отбасы мүшелеріне алғысын білдірді.
— Шаңырақ шаттығы мен ұлттық тәрбиені ұлықтайтын бұл байқаудың маңызы ерекше. Әрбір жанұя мерейлі, мәртебесі биік болса, қазақ елінің де абыройы асқақ болары анық. Мәңгілік ел болуды мақсат тұтқан Қазақ елінің әрбір отбасының мерейі үстем болғай. Марапат иелерін шын жүректен құттықтаймын, — деді ол.
Естеріңізге сала кетейік, «Мерейлі отбасы – 2021» ұлттық байқауына қатысу үшін биылғы жылы облыс бойынша 184 отбасы өтініш білдіріп, облыстағы барлық аудан, қалаларда ұйымдастырылған байқаудың алғашқы кезеңінде 30 отбасы жеңімпаз атанған болатын.
