Келісімге сәйкес, компания балаларға керекті спорттық киімдерді сатып алуға, қатысу жарнасын төлеуге, сондай-ақ көлікке қаржы бөледі.
«Біз бұл лигаға алғаш рет қатыспақпыз. «Kozildirik Media Group» және оның басшысы Алмас Тоқабаевқа қаржылық қолдау көрсеткені үшін алғыс айтамыз. Аталмыш компания бұдан бұрын да қолдау көрсеткен болатын, алайда жасырын қалған еді. Енді лайықты ойын көрсетеміз деген сенімдемін»-деді жоба жетекшісі.
Алмас Тоқабаевтың айтуынша, бұл балалар үшін де, компания үшін де маңызды қадам.
«Ауылдағы балалар спортының жай-күйін жақсы білеміз. Сондықтан мүмкіндігінше көмектесуге тырысамыз. Мен ауылдан шыққан, дамыған, түрлі салада жетістікке жеткен балалардың көп екенін білемін. Егер, сол азаматтардың әрбірі ауылына, ауыл спортының, мәдениеті мен ғылымының дамуына қол ұшын тигізсе нұр үстіне нұр болар еді»,- деп баса айтты.
Айта кетейік, «RedSapsans» футбол клубы Лигаға 2008 және 2009 жылдары туған балалардан құралған 2 команда қатыстырады. Турнир 11 қыркүйек күні басталып, қараша айына дейін жалғасады.
«Ауылфутбол» жобасы дегеніміз не? Бұл жоба Алматы облысы Қарасай ауданы Райымбек ауылында 2020 жылдың басында «RedSapsans» балалар футбол клубы құрылған сәттен бастап іске қосылды. Бүгінгі таңда клубта 7 жастан 13 жасқа дейінгі 60-тан астам бала тегін жаттығады. Жобаның басты мақсаты — демеушілерді тарту арқылы ауылдық балалар футбол клубтарына жан-жақты көмек көрсету. Жобаны іске асыру кезінде 30-дан астам балалар командасына көмек көрсетілді, 2 ауылда алаңдар салынды, сондай-ақ Қазақстанның 5 облысында 10-нан астам турнир өткізілді.
Ал демеуші болып бастама көтерген «Кozildirik Media Group» компаниясы коммуникация саласындағы барлық қызмет түрлерін ұсынатын тәуелсіз компания. Бұл ұйым әлеуметтік желілерді мониторингтеу және талдау, кешенді SMM және беделді реттеу; pr-стратегияларды әзірлеу, сондай-ақ дағдарысқа қарсы шараларды жүзеге асырумен айналысады.
