Түркістан облысында ерекше жеміс ағашы өседі, деп хабарлайды Хабар24. Жергілікті жұрт «Тау пістесі» деп атап кеткен жаңғақ тұқымдас дәнді дақыл көпшілікке «фисташка» деген атпен жақсы таныс. Тау пістесі еліміз бойынша тек Түлкібас ауданындағы Тау Пістелі аймағында ғана өседі.
Тау пістесі Сайрам-Өгем ұлттық табиғи паркіне қарасты Пістелі ауылы маңындағы таулы аймақтарда ғана өседі. Бойы 5-6 метр болатын жаңғақ тұқымдас ағаш 150-200 жыл өмір сүреді. Өзге дәнді дақылдардан ерекшелігі алғашқы жемісін тек 30 жылдан кейін береді.
Тау пістесі тамыз айының соңы мен қыркүйектің орта тұсында піседі. Түлкібастық тау пістесінің Орта Азия елдерінде өсетін пістеден ерекшелігі көлемі кішірек келеді. Ал, құрамы 2 есе майлы яғни, құнарлы. Дәмі тіл үйіреді. Осы Пістелі ауылында туып-өскен белгілі жазушы Мархабат Байғұт Тау пістесінің әлі де толық зерттелмей жатқанын айтады.
«Пістелінің дәмі керемет. Дәмі, емдік қасиеті, жалпы сапасы жөнінен Алайдың тау пістесі мұның қасында қалып кетеді. Тау пістенің ең мықтысы осы. Дәл осы жердің Тау пістесі бұл әлі жөнді зерттелмеген, жан-жақты жазылып, насихатталмай жатыр», дейді жазушы М.Байғұт.
Сайрам-Өгем ұлттық табиғи парк қызметкерлерінің айтуынша, Тау пістесінің көшетін алып, өсіру өте қиын. Тек аталығы мен аналық бұтақтары қатар тұрғанда ғана гүлдеп, жеміс береді. Әр түптен шамамен екі-үш келі өнім алуға болады. Қазіргі таңда ұлттық парктің Көкбұлақ бөлімшесі осы бірегей жеміс ағашын ғылыми жолмен жерсіндіру жұмыстарын жүргізуде.
