Кентау қаласында 1 қыркүйек — Білім күні қарсаңында «Дара жол» мектеп лицей-интернаты ашылды. Жаңа мектептің алғашқы қоңырау салтанатына қала әкімі аппаратының басшысы Амалбек Өміртай мен қалалық мәслихат хатшысы Талғат Балабиев қатысып, бүлдіршіндерді жаңа оқу жылының басталуымен құттықтады.
450 орындық білім ордасы бұрын «Ащысай түсті металл» комбинатының кеңсесі болған. Ал, кейінгі тоқырау жылдары 3 қабатты нысан қараусыз қалған. Биыл жергілікті кәсіпкер Сембек Әбдірахмановтың қолға алуымен күрделі жөндеу жұмыстары жүргізіліп, жаңа білім ошағының есігі айқара ашылды.
«Мектепті «Дара жол» деп атап отырмыз. Себебі мұнда білім алған әрбір баланың жолы дара болуы керек. Білім беру орталығы толығымен қажетті құралдармен жабдықталды. Асхана мен жатақханада жұмыс істейді. Сапалы білім мен саналы тәрбие беруге барлық мүмкіндігіміз бар, – дейді кәсіпкер Сембек Әбдірахманов.
