2021 жылдың 26 тамызында, сағат 19.10-да, Байзақ ауданы, Қайнар ауылында орналасқан Қазақстан Республикасы Қорғаныс министрлігінің No28349 әскери бөлімінің (инженерлік бригада) оқ -дәрі қоймасы жарылды. Бұл бөлім Тараз қаласынан шамамен 18 шақырым қашықтықта орналасқан.
Дабыл белгісі бойынша:
Облыстың полиция департаментінің жеке құрамы(300 адам) және 5513 әскери бөлімінің жеке құрамы (520 адам) қызметке кірісті.
Апат болған жерге баратын барлық жолдар, соның ішінде теміржол уақытша жабылды.
Жақын маңдағы Базарбай, Үш-Бұлақ, Жаңатұрмыс ауылдарының тұрғындары эвакуацияланды.
Жарақат алғандар саны – 66-ға жетті. Қайнар, Ботамойнақ, Жібек Жолы ауылдарының және Үшбұлақ станциясының 1200-ге жуық тұрғыны Тараз қаласының мектептеріне көшірілді.
Аймақта теміржол қатынасы тоқтады. Президент жағдайдың толық бақылауда екенін айтып, тұрғындарды сабыр сақтауға шақырды.
ТЖ туралы ақпарат білу үшін қауырт желі ашылды: 8 (7262) 51-41-67, 8(7262) 51-37-75. Сондай-ақ 109 нөміріне хабарласуға, 8-778-810-91-09 WhatsApp нөміріне хабарлама жіберуге болады.
27 тамыз, таңғы 08.00-дегі жағдай бойынша ауруханаларда 28 науқас жатыр, оның алтауы ауыр хәлде екені нақтыланды. 32 дәрігер, олардың арасында дәрігер-травматологтар, нейрохирургтер, хирургтер, реаниматологтар және басқалары, 56 орта медицина қызметкері жұмылдырылған. Аурухана дәрі-дәрмекпен қамтамасыз етілген.
Қорғаныс министрлігінің өкілдері «Арыс қаласындағы өрт салдарын жойғаннан кейін аталған қоймаға инженерлік оқ-дәрілердің бір бөлігі шығарылған. Бұл қоймада алысқа ұшып жарылатын снарядтар жоқ» деп мәлімдеді.
Қорғаныс министрлігі 27 тамыз күні таңғы сағат 9.30 шамасында 4 әскери қызметшінің қаза тапқанын мәлімдеді. Сондай-ақ із-түссіз жоғалғандар да бар. Қазіргі уақытта оларды іздеу жұмыстары жүргізілуде. Министрлік «Жарылыстар уақыт өте тоқтады, алайда өрт әлі сөнген жоқ. Инженерлік оқ-дәрі мен жарылғыш заттар үлкен қопарылыс толқынын, жалын мен шу әсерін тудырып, жанып, жарылуы мүмкін» — деді.
