Облыс аумағында қоғамдық-саяси және этносаралық тұрақтылықты қамтамасыз ету, ұлтына, тіліне қарамастан тұрғындардың бір-біріне деген құрмет көзқарасын қалыптастыру мақсатында өткізілген семинарға облыс әкімінің орынбасары Сәкен Қалқаманов, облыс прокурорының орынбасары Жомарт Нұрғали, облыстық қоғамдық даму басқармасының басшысы Дамир Жүнісов, құқық қорғау органдарының басшылары мен қала, аудандардың әкімдері және тарихшы, ғалымдар мен облыстағы этнос өкілдері қатысты.
Шарада модератор болған Сәкен Қалқаманов «Өңірімізде этносаралық келеңсіздікке жол бермеу үлкен жауапкершілік. Себебі, қоғамда тұрақтылықты сақтау — біздің міндетіміз. Тұрақтылық болмаған жерде даму да болмайтынын өздеріңіз жақсы білесіздер» деп атап өтті.
Еліміздегі эпидемиологиялық ахуалға байланысты «ZOOM» платформасы арқылы өткізілген жиында этносаралық қақтығыстардың алдын алудың заманауи әдістері, модельдері, теориялық және практикалық аспектілері талқыланып, мемлекеттік органдар арасындағы өзара іс-қимылдардың маңыздылығы туралы белгілі ғалымдар мен осы салада еңбек етіп жүрген кәсіби мамандардың баяндамалары тыңдалды.
Облыс прокурорының орынбасары Жомарт Нұрғали облыстағы этносаралық тұрақтылықты сақтаудың басым бағыттары мен сол бағыттағы атқарылып жатқан жұмыстарды баяндады.
Сонымен қатар, басқосуда тарих ғылымдарының докторы, профессор Жамбыл Артықбаев «Қазақстандағы этносаралық тұрақтылықты қамтамасыз етуде мәдени ықпалдастықты дамыту» тақырыбында баяндама жасап, мәдени ықпалдастықтың нығаюы этносаралық тұрақтылықты сақтаудың басты жолы екендігін атап өтті.
Ал белгілі дінтанушы, Қ.А.Ясауи атындағы Халықаралық қазақ-түрік университеті, Түркология ғылыми-зерттеу институтының директоры Досай Кенжетай «Еліміздің оңтүстік өңірлерінде этноәлеуметтік үрдістің дамуының негізгі бағыттары; сарапшылық баға», Қ.А.Ясауи атындағы Халықаралық қазақ-түрік университетінің доценті, PhD доктор, Түркістан облыстық Қазақстан халқы Ассамблеясы жанындағы ғылыми-сарапшылық топтың жеткешісі Қайнар Қалдыбай «Этносаралық қақтығыстарды реттеу және азаматтық келісімді қолдау: модельдер, тәсілдер, тәжірибелер» тақырыптарында баяндама жасап, өз ойлары мен ұсыныстарын ортаға салды.
Семинар барысында өңірдегі этнос өкілдерінің тыныс-тіршілігін баяндайтын «Этносаралық келісім тұрақтылығы» тақырыбында бейнеролик жұрт назарына ұсынылып, мүдделі органдарды ақпараттық материалдармен қамтамасыз ету мақсатында әдістемелік құралдар шығарылып, қатысушыларға таратыландығы айтылды.
