Қазақстан шекарасынан 50 келі күмісті жасырын алып кетуге тырысқан тұрғын ұсталды. Бұл туралы ҰҚК баспасөз қызметі хабарлайды.
21 тамызда шекарашылар Жамбыл облысындағы «Қарасу» өткізу пунктінде Mercedes-Benz маркалы автокөлік салонын тексеру барысында орындық астынан полиэтиленге оралған күміс бұйымдарды тапқан.
«Бұйымдардың жалпы салмағы 50 келі 516 грамм болған. Алдын ала бағалау құны 16 миллион теңге болды», – деді ведомство өкілі.
Факт бірыңғай деректер тізіліміне тіркелді. Айыпталушы мен контрабандалық жүк Жамбыл облысы бойынша Экономикалық тергеу департаментіне іс жүргізу әрекетін жүргізу үшін тапсырылған.
