Ресей федерациясының Уфа қаласында еркін, грек-рим және әйелдер күресінен жастар арасында әлем чемпионаты мәреге жетті. Әлем чемпионатында Түркістан облысының балуандары ел қоржынын бір алтын және екі қола медальмен толықтырған болатын. Бүгін әлем чемпионы Нилуфар Раимова мен қола жүлдегер Мадина Аман туған елге оралды. Оларды «Turkistan» әуежайынан Түркістан облысы әкімінің орынбасары Сәкен Қалқаманов пен жанкүйерлер, спорт саласының өкілдері сән-салтымен қарсы алды. Жалпы Уфа төрінен Түркістан облысының өрендері 1 алтын, 2 қола медаль еншіледі.
Дүние жүзінің кіл мықтылары бақ сынаған турнирде Келес ауданының тумасы Асылжан Есенгелді еркін күрестен 57 келі салмақ дәрежесінде белдесіп, қола жүлдегер атанды. Бапкері – Қанат Тұрғараев. Ол бұған дейін еркін күрестен жасөспірімдер арасындағы Қазақстан Ресбуликасының және Азия чемпионаттарының күміс жүлдегері атанып үлгерген. Сондай-ақ ел чемпионатының жастар арасындағы V жастар ойынының жеңімпазы.
Екінші қола жүлдегер Мадина Аман қыздар арасында 59 келі салмақта көк туды желбіретті. Боз кілем төрінде бар күш-жігерін ортаға салған түркістандық арудың қадамын мамандар жоғары бағалап отыр. Бапкері – Нұржігіт Ерімбетов.
Ал Нилуфар Раимова 57 келі салмақта өзінің мықты екенін дәлелдеді. Ол финалдық кездесуде Италияның балуаны Аврора Руссоны 8:6 есебімен тізе бүктірді. Осылайша Қ.А.Ясауи атындағы ХҚТУ-нің 3-курс студенті еркін күрестен әлем чемпионы атанып отыр. Спортшы арулар – Ә.Нұрмаханов атындағы облыстық олимпиада резервін дайындайтын мамандандырылған балалар мен жасөспірімдер спорт мектебінің өрендері.
