Түркістан қаласында «Түркістан Арена» стадионында футболдан жасөспірімдер арасында жолдастық кездесу өтті. Кездесу «Тұран» футбол клубының 2007 жылғы туған жасөспірімдер командасы мен облыстық балалар мен жасөспірімдердің мамандандырылған футбол мектебінің 2007 жылғы туған командалар арасында болды.
Жолдастық кездесуге Түркістан облысы әкімінің орынбасары Сәкен Қалқаманов, бокстан олимпиада ойындарының қола жүлдегері Сәкен Бибосынов арнайы қатысқан.
Мемлекет басшысының тапсырмасына сәйкес, қазір спорт саласын реформалау жүріп жатыр. Соның ішінде балалар спортын дамытуға басымдық беріледі. Облысы əкімі Өмірзақ Шөкеевтің бастамасымен өңірде бұқаралық және балалар спортын дамытуға күш салынып, балалар футболының өркендеуіне ерекше назар аударылған.
Кездесу барысында ел намысын әлемдік аренада қорғап жүрген С.Бибосынов жастарға ұлағатты сөзін арнады. Бүгінгі толқынның қарымы мықты екенін айтып, жастарға жігер берді. Токио олимпиадасының қола жүлдегері қоғамды алға жетелеуге ықпал ететін – салауатты өмір салтын ұстанып, ұлттық рухани құндылықтарды насихаттауға үндеді.
Айта кетерлігі, Түркістан облыстық футбол мектебінің 2007 жылғы шəкірттері 2020 жылы футболдан жасөспірімдер арасындағы Қазақстан чемпионатының күміс жүлдегері атанған. Ал, «Тұран» командасының 2007 жылғы жас ойыншылары да биылдан бастап еліміздің футбол академиялары мен жасөспірімдер арасында өтетін ел чемпионатына қатысып, облыс намысын қорғайды.
