Еліміздегі жоғары оқу орындарында вакцина алған студенттер мен оқытушыларға түрлі жолдамалар мен ақшалай сыйлықтар таратылуда,-деп хабарлайды TurkistanZaman ақпараттық порталы BAQ.KZ-ке сілтеме жасай отырып.
Атап айтсақ, С. Аманжолов атындағы Шығыс Қазақстан университетінде вакцинацияның толық циклынан алғашқылардың бірі болып өткен студенттер Сібе көлдерінің демалыс орнына жолдама алды. Университет ректоры Мұхтар Төлегеннің айтуынша, студенттер екпе жұмыстарына белсенді түрде қатысуда.
«Сібе көлдерінің демалыс орнына жолдаманы белсенді 20 студент жеңіп алды. Олар акция жарияланған сәттен бастап вакцинаның екі компонентін салдырған. Университетте барлық санитарлық-эпидемиологиялық талапты сақтай отырып, оқу жылын бастауға дайындық жұмыстары қызу жүріп жатыр. Маусымнан бастап «Ashyq» жүйесі жұмыс істейді. Барлық аудитория, зертхана, спорттық және басқа да оқу орындарында қажетті жұмыстар жүргізіліп жатыр», – деп атап өтті Мұхтар Төлеген.
Одан өзге 60 шақты студент арнайы жеңілдіктер мен ынталандыру сыйлықтарына ие болды. Ұтыс ойынының алғашқы кезеңінде 10 студент 25 мың теңгеден, ал оқытушылар мен қызметкерлер 50 мың теңгеден алды. Екінші кезең қыркүйектің алғашқы онкүндігіне жоспарланып отыр.
Еске сала кетейік, бұған дейін Білім және ғылым министрі Асхат Аймағамбетовтің тапсырмасы бойынша университеттер білім алушылар мен қызметкерлер арасында вакцинацияны ынталандыру шараларын әзірлеген болатын.
