Түркістан облысындағы мектептер толықтай бейнебақылау жүйелерімен, дабыл батырмаларымен, мамандандырылған күзетпен қамтамасыз етілуде,- деп хабарлайды TurkistanZaman ақпараттық порталы.
Атап айтсақ, облыста мектеп оқушыларының қауіпсіздігін қамтамасыз ету мақсатында 900 мемлекеттік мектеп толығымен бейнебақылау жүйесімен қамтамасыз етілді. Бүгінде полиция департаментімен мектептегі бейне камераларды интеграциялау жұмыстары бойынша Жол картасы түзіліп, 1 қыркүйекке дейін 400 мектептің бейне камерасы қосылады. Қалған 227-і жыл соңына дейін іске асырылады деп жоспарлануда.
Сонымен қатар, мамандандырылған күзет пен «дабыл батырмалары» да назардан тыс қалмады. Мектептердегі балалардың қауіпсіздігі мәселесі кезең-кезеңімен шешімін тауып келе жатыр.
Былтырғы жылдың басынан бері мектептерді ішкі әжетханалармен қамтамасыз ету үшін 756 мектеп назарға алынып отыр. Өткен жылдың өзінде 679 мектептің ішкі әжетханасы қалпына келтірілсе, биылғы жылы 20 мектептің ішкі әжетханасы реттеледі. Қалған 57 мектептің мәселесі 1 қыркүйекке дейін толығымен шешімін табады.
Өңірдегі жылу маусымына дайындық та қызу жүргізілуде. Білім беру мекемелеріне қажетті 107 мың тонна қатты отын (көмір) және 3,5 мың тонна сұйық отынмен (диз.топливо) қамтамасыз ету жоспарланып отыр. Тасымалдау жұмыстары 40%-ға орындалып, келісім-шартқа сәйкес жүретін болады.
