Түркістан полицейлері танысының атынан несие рәсімдеген әйелді анықтады,- деп хабарлайды TurkistanZaman ақпараттық порталы BAQ.KZ-ке сілтеме жасай отырып.
Нақтырақ айтсақ, Түркістан облысы Кентау қалалық ПБ-ға жергілікті тұрғын шағым түсіріп, өзінің бұрынғы танысын жауапқа тартуды сұраған. Шағымданушының айтуынша, танысы оның атынан 90 000 теңге несие рәсімдеген. Несие көлемі уақыт өткен сайын артып, қарыз өсіп кеткен. Қылмыс түрі ҚР ҚК-нің 190-бабы («Алаяқтық») бойынша тіркеуге алынды
Жедел-іздестіру шараларын ұйымдастыру арқылы құқық бұзушылықты жасаған жас әйел табылды. Полицейлер алаяқтыққа қатысы бар Сауран ауданының тұрғынын ұстап, полиция бөліміне жеткізді. Ол өз кінәсін толық мойындады.
Белгілі болғандай, әйел танысының жеке мәліметтерін пайдаланып, оның ұялы телефоны арқылы несиеге ұсыныс берген. Несие мақұлданғаннан кейін, ақшаны толықтай өзіне аударып алған. Бұл қылмысқа ол банктегі қарызын жабу үшін барған.
«Барлығыңызға мәлім, алаяқтықтың бүгінгі таңдағы жаңа түрі – ақпараттық технологиялардың дамуына байланысты интернет-алаяқтық болып отыр және оның түрлері де күн өткен сайын кең таралып, көбейіп келеді. Яғни бұл жерде қылмыскер компьютер, смартфон, планшет секілді заманауи құралдардың көмегімен интернет арқылы жымысқы әрекеттерді жасайды. Сондықтан барынша сақ болыңыз! Кез келген адамға сенбеңіз, өзіңізге ғана белгілі құпия сандарды ешкімге айтпаңыз. Қандай да бір алаяқтықтың куәсі не құрбаны болсаңыз, тез арада полицияның «102» нөміріне хабар беріңіздер», — делінген ПД таратқан хабарламада.
