Түркия орман өртінен есін жимай жатып, су тасқыны басталды, деп хабарлайды Tengrinews kz Reuters-ке сілтеме жасап. Нөсер жаңбырдан басталған су тасқыны бірнеше ауылды жарықсыз қалдырып, көпірді бұзған. Сел Түркияның қара теңіз жағалауына жетті.
Су тасқыны Синоп, Бартын, Қарабүк және Кастамону провинцияларына зақым келтірді. Атап айтқанда, Түркияның солтүстігіндегі Бартын провинциясында көпір құлады. Төтенше жағдай салдарынан 13 адам зардап шекті, бір адам жүрек талмасынан қайтыс болған. Құтқару қызметкерлері 80 жастағы жоғалған әйелді іздеуде. Премьер‐Министр жанындағы Төтенше жағдайлар және апаттар басқармасы (AFAD) мәліметтері бойынша 12 ауылда жарық сөнген. Сондай-ақ, ғимараттардың бірінші қабаттары су астында қалып, көшедегі көліктерді сел ағызып алып кеткен.
Бартыннан 240 шақырым жердегі Синоп провинциясында селден зардап шеккен аудандарда бірқатар үй қираған. Ресми өкілдердің айтуынша, қауіптің алдын алу үшін мемлекеттік аурухана эвакуацияланды.
Мәліметке сәйкес, іздеу-құтқару жұмыстары жүргізіліп, иұрғындарды су алып кеткен үрмелі қайықтармен құтқарып жатыр.
Естеріңізге сала кетейік, шілде айының соңынан бастап Түркияда орман өрттері өршіп тұр. Көптеген танымал курорттар 13 провинциядағы орман өрттерінің салдарынан туристік маусымның ортасында от пен түтінге оранды. Кейбір жерлерде тілсіз жау тұрғын үйлер мен қонақ үйлерге қауіп төндіріп, туристер мен жергілікті тұрғындар эвакуацияланды. Билік өрт әдейі ұйымдастырылған деп күдіктенді. Кейін террористік ұйым Түркиядағы өрт үшін жауапкершілікті өз мойнына алды.
