Түркия: Тілсіз жау әлі де дес берер емес

28 шілдеден бастап Түркияның оңтүстігінде және батысында ормандар өртенуде, деп хабарлайды tourweek.ru сайты. Түрік БАҚ-ның хабарлауынша, соңғы 5 күнде Түркияда 125 ірі өрт тіркелген. Ең көп өрт ошағы Анталия және Мугла провинцияларының ормандарында орын алған. Бұл аймақтан алты ауданның тұрғыны эвакуацияланып, 10 адам қайтыс болды.
Төтенше жағдаймен күресте бүкіл Түркияның жан-жағынан өрт сөндіру техникалары тартылған. Өртті сөндіруге Ресей де көмек көрсетуде. Түркияға Ресейдің ТЖМ және Қорғаныс министрлігінен құралған жиынтық топ жіберілді, оның құрамына Ил-76 және Бе-200 ұшақтарын қоса алғанда, авиатехниканың 11 бірлігі кірді. Түрік билігінің ресми мәліметтеріне сәйкес, 125 өрттің 117-сі сөндірілген. Алайда, әлемдік БАҚ Түркияның оңтүстік жағалауының едәуір бөлігінің әлі де түтін құрсауында тұрғанын спутниктен түсірілген фото арқылы көрсетуде.
Қонақ үйлер маңында түсірілген, түтін анық көрінетін суреттерді түрік елінде жүрген блогерлер де жарыса жариялауда.
Дүйсенбі күні таңертең Түрік билігі мәлімдегендей, Анталия мен Белекте өрттің барлық ошағы сөндірілді. Кемер-Арсланбуджак ауданында үш жаңа өрт тіркеліп, олар дер кезінде сөндірілді. 31 шілде күні Аланиядағы курорттық ауылдар желісінде түтін сезілгенімен, 1 тамыз күні жағдай қалпына келді. Жаңадан басталған екі өрт ошағы тез сөндірілді. Сидтің адам жүрмейтін таулы аймағында өрт әлі жалғасқанымен, туристік аймақтарға қауіп төніп тұрған жоқ. Чолаклы курортында басталған ірі өрт ошағы да дер кезінде ауыздықталды.
31 шілде күні Бодрумның Кумбахче ауданында қауіпті өрт болып, жергілікті қонақ үйлерден туристер эвакуацияланды. Оның ішінде жүзге жуық ресейлік азаматтар да болды. Қазіргі таңда өрт ошағы сөндіріліп, 2 тамыз күні қонақтарды қонақ үйге жайғастыру жұмысы жоспарлы түрде жүзеге асуда.
Ал Мармаристегі Ичмелер және Турунч аудандарындағы қонақ үйлерден алдын ала туристер эвакуацияланып, олардың тең жартысы келер күні бөлмелеріне қайта орналасты. Қалған жартысы бүгін толығымен өздері броньдаған қонақ үйге оралады.