Цифрлық дәуірде қаржылық алаяқтық тәуекелі күннен-күнге артып келеді. Алаяқтар IT-технологиялар мен әлеуметтік инженерия әдістерін шебер қолданып, азаматтардың жеке деректерін иемденіп, олардың атына рұқсатсыз кредит ресімдеу жағдайларын жиілетіп отыр. Мұндай алаяқтықтың алдын алудың тиімді құралы ретінде «Стоп кредит» сервисі қолданылады.
«Стоп кредит» сервисі қандай жағдайларда көмектеседі?
1. Жеке деректерді пайдаланып кредит ресімдеуге тосқауыл қояды
Егер жеке куәлігіңіз жоғалып кетсе немесе оның деректері алаяқтардың қолына түссе, олар онлайн-өтінім арқылы сіздің атыңызға кредит ресімдеуге тырысуы мүмкін. Бірақ «Стоп кредит» қызметі белсенді болса, кредит беру процесі автоматты түрде бұғатталады – сіздің рұқсатыңызсыз ешқандай қарыз рәсімделмейді.
2. Онлайн-банкинг арқылы рұқсатсыз қарыз рәсімдеуді болдырмайды
Алаяқтар сіздің интернет-банкинг логиніңіз бен пароліңізді фишинг немесе деректер базасын бұзу арқылы қолға түсіріп, бірнеше рет басу арқылы кредит ресімдеуге ұмтылуы мүмкін. Бұл жағдайда да «Стоп кредит» қызметі іске қосылып тұрса, барлық кредиттік өтінім автоматты түрде кері қайтарылады.
3. «Жалған банкирлердің» схемасына қарсы қорғаныс
Жалған банкирлер сізбен байланысып, «сіздің атыңызға кредит рәсімделіп жатыр» деген желеумен сізді алаңдатуы және ақшаңызды «қауіпсіз шотқа» аударуға көндіруі мүмкін. Егер сізде алдын ала қосылған «Стоп кредит» қызметі болса, мұндай сценарий іске аспайды – жүйе автоматты түрде кредит ресімдеуді тоқтатады.
4. Психологиялық қысымнан қорғайды
Кейде таныстар, туыстар немесе «қаржылық кеңесшілер» тиімді ұсыныс ұсынып, сізді кредит алуға итермелеуі мүмкін. Сіз бас тартқыңыз келсе де, қысымға шыдай алмай, келісіп кетуіңіз ықтимал. Бұл жағдайда да «Стоп кредит» – қорғау құралы ретінде әрекет етеді: онлайн-кредиттерді рәсімдеуге тосқауыл болады.
Алаяқтықтан сақтану үшін қандай қауіпсіздік шараларын сақтау қажет?
Қаржы қауіпсіздігі әр адамның жеке жауапкершілігін талап етеді. Сондықтан келесі цифрлық гигиена ережелерін ұстанған жөн:
-
Жеке деректерді (ЖСН, жеке куәлік деректері, банк картасы нөмірі, CVV-код) ешкімге бермеңіз.
-
SMS, мессенджерлер немесе e-mail арқылы келген күмәнді сілтемелерге өтпеңіз – олар фишингтік сайттар болуы мүмкін.
-
Интернет-банкингте міндетті түрде екі факторлы аутентификацияны қосыңыз.
-
Кредиттік тарихыңызды үнемі тексеріп отырыңыз – мұны еліміздегі кредиттік бюролар немесе eGov.kz порталы арқылы жасауға болады.
-
Егер сіз жақын арада кредит алуды жоспарламасаңыз, eGov.kz арқылы ерікті түрде қарыз алуға тыйым қоюды рәсімдеңіз. Бұл — тегін және бірнеше минут ішінде жүзеге асады.
Қорытынды
«Стоп кредит» – бұл цифрлық дәуірдің қаржылық қауіптерінен қорғанудың маңызды тетігі. Бұл қызмет азаматтарды алаяқтардың қылмыстық әрекеттерінен қорғауға, кредиттік тарихты сақтап қалуға және күтпеген қаржылық шығындардың алдын алуға мүмкіндік береді. Егер сіз қауіпсіздік шараларын уақтылы қолға алып, сандық сауаттылықты арттырсаңыз – сіздің жеке және қаржылық деректеріңіз сенімді қорғалған болады.
