Қытай Халық Республикасының Шанхай қаласында өтіп жатқан ITB China 2025 халықаралық туризм көрмесі аясында Түркістан облысы мен Қытай арасындағы туристік ынтымақтастықты нығайтуға бағытталған келісімдерге қол қойылды. Іс-шараға Түркістан облысы әкімінің бірінші орынбасары Зұлпыхар Жолдасов бастаған ресми делегация арнайы жұмыс сапарымен қатысты.
Көрме алаңында Түркістан облысының туристік әлеуеті кеңінен таныстырылды. Облыстық туризм басқармасының басшысы Нұрдәулет Медеуов өңірдің бай тарихи-мәдени мұрасы, табиғи ландшафттары мен заманауи туристік инфрақұрылымы туралы толық ақпарат беріп, халықаралық серіктестерге Түркістан өңірінің инвестициялық және туристік тартымдылығын жан-жақты көрсетті.
Сапар барысында қазақстандық делегация Қытайдың жетекші туристік компанияларымен және ірі халықаралық туроператорларымен екіжақты кездесулер өткізді. Атап айтқанда, Beijing Fine Tour International Travel Service Co. Ltd және CYTS Xinjiang Culture and Tourism Development Co., Ltd компанияларының басшылықтарымен арнайы келіссөздер жүргізілді.
Кездесулер барысында тараптар Түркістан қаласына келетін туристер ағынын арттыру, екі ел арасындағы тікелей туристік бағыттарды дамыту, бірлескен турпакеттер жасау және ақпараттық-насихат жұмыстарының тиімділігін арттыру жолдарын талқылады.
Нәтижесінде, екі тарап арасында өзара ынтымақтастықты кеңейту жөнінде бірнеше меморандумға қол қойылды. Бұл құжаттар Түркістан мен Қытай арасындағы туристік ағынды көбейтуге, визалық рәсімдер мен логистикалық мүмкіндіктерді оңтайландыруға, сондай-ақ туризм саласындағы тәжірибе алмасуды жандандыруға бағытталған.
Шара барысында Түркістан облысының туризм саласына қатысты бірнеше бағыт бойынша нақты ұсыныстар мен жобалар таныстырылды. Атап айтқанда:Киелі орындарға бағытталған рухани-мәдени турлар; Эко-туризм мен этнотуризмді дамыту; Спа-орталықтар мен шипажай қызметтерін Қытай нарығына бейімдеу; Жоғары сапалы гидтер даярлау және тілдік қолдау механизмдері.
Зұлпыхар Жолдасов өз сөзінде Түркістанның «Ұлы Жібек жолының» маңызды тарихи орталығы болғанын атап өтіп, қазіргі таңда өңірде заманауи туристік нысандармен қатар, көне тарихи орындарды қалпына келтіру жұмыстары қарқынды жүргізіліп жатқанын жеткізді. Ол сондай-ақ өңірге келетін шетелдік туристерге қолайлы жағдай жасау – облыс басшылығының басты басымдықтарының бірі екенін атап өтті.
Сонымен қатар, делегация көрме аясында ұйымдастырылған панельдік сессиялар мен халықаралық форумдарға қатысып, Орталық Азия өңіріндегі туризмнің даму перспективалары туралы пікір алмасты.
Қытай тарапы Түркістан облысының тарихи-мәдени нысандарына, әсіресе Түркістан қаласындағы Қожа Ахмет Ясауи кесенесіне, сондай-ақ өңірдегі табиғи демалыс аймақтарына ерекше қызығушылық танытты. Қытайлық туроператорлар Түркістан бағыты бойынша чартерлік рейстер мен турпакеттер дайындауға дайын екендіктерін білдірді.
Аталған келісімдер мен бастамалар Түркістан өңірінің халықаралық деңгейдегі туристік беделін арттыруға, жаңа жұмыс орындарын ашуға және өңірлік экономиканың дамуына серпін бермек.
