Түркістан облысында ауыл шаруашылығын дамыту бағытында атқарылып жатқан жұмыстар кеңінен талқыланды. Бүгін облыс әкімінің орынбасары Нұрбол Тұрашбековтың төрағалығымен өткен жиналыста индикаторлық жоспардың іске асу барысы бойынша аудан, қала көрсеткіштері жан-жақты сарапталды. Сонымен қатар, Ұлттық ауыл шаруашылығы санағына өңірлердің дайындығы пысықталып, берілген тапсырмалардың орындалуы және өзекті мәселелердің шешу жолдары қарастырылды.
Жиында басқарма басшылары аудан мен қалалардағы кешігіп жатқан бағыттар мен көрсеткіштерге назар аударып, орын алған кемшіліктерді ашық айтты. Су үнемдеу технологияларын енгізу жұмыстары Түлкібас, Бәйдібек, Келес аудандары мен Кентау қаласында тиісті деңгейде жүзеге асырылмағаны айтылады. Бұл мәселе облыс әкімінің орынбасары тарапынан өзге өңірлерге де ескертіліп, маңыздылығы атап өтілді.
Сонымен қатар, инвестиция тарту, қарқынды бау шаруашылығын дамыту, жылыжай салаларын кеңейту және ауыл шаруашылығы техникасын сатып алу бағытындағы жоспарларды орындау мәселесі де талқыланды. Аудандар арасында тәжірибе алмасу арқылы осы бағыттағы жұмыстарды жандандыруға ұсыныс жасалды.
Облыс әкімінің орынбасары Нұрбол Тұрашбеков басқарма басшылары мен аудан әкімдері орынбасарларына нақты тапсырмалар беріп, кедергілерді бірлесіп талқылап, тиімді шешім қабылдауды міндеттеді. «Жыл басында белгіленген межемен бәріңіз келістіңіздер, енді айтқан уәждеріңіз қабылданбайды. Мәселе бөлімдегі мамандарға жүктегенмен шешілмейді. Жауапкершілік сіздерден талап етіледі. Сондықтан кабинеттен шығып, шаруашылықтарды аралаңыздар. Тек осылай ғана нақты шешім мен ұтымды ұсыныс айта аласыздар», — деді Нұрбол Тұрашбеков.
Күн тәртібінде Ұлттық ауыл шаруашылығы санағына дайындық барысы туралы мәліметтер ұсынылып, оның нәтижелерімен қатар бірқатар тапсырмалар нақтыланды. Аталған санақтың өткізілуі өңірдегі ауыл шаруашылығының нақты көрсеткіштерін анықтап, болашақ даму стратегиясын қалыптастыруға бағытталған маңызды шара болып отыр.
Жиналыс қорытындысында ауыл шаруашылығы саласының дамуына қатысты ұсыныстар мен ұсынылған шешімдер нақты тапсырмаларға айналып, олардың орындалуын бақылау жүйесі күшейтілмек. Бұл бағытта аудандар мен қалалар арасында тиімді ынтымақтастық пен тәжірибе алмасу арқылы өнімділік арттырылмақ.
Осындай жүйелі жұмыстар Түркістан облысының агроөнеркәсіп кешенінің дамуына серпін беріп, ауыл шаруашылығындағы өндірістік көрсеткіштерді жақсартуға мүмкіндік туғызады. Әкімшілік деңгейінде қолға алынған бұл шаралар өңірдің экономикалық әлеуетін арттыруға, ауылдық жерлердегі тұрақты жұмыспен қамтуды қамтамасыз етуге және азық-түлік қауіпсіздігін нығайтуға бағытталған.
Жалпы, облыста ауыл шаруашылығын дамыту — мемлекеттік саясаттың басты бағыттарының бірі болып табылады. Жергілікті атқарушы органдар мен аграрлық сала өкілдерінің бірлесе атқарған жұмыстары өңірдің тұрақты дамуына және халықтың әл-ауқатын арттыруға септігін тигізуде.
