Қазіргі уақытта қоғамда кеңінен таралып жатқан жалған ақпарат тарату, халықтың бұқаралық санасына манипуляция жасау, қаржылық пирамидалар, интернет-алаяқтық, лудомания (құмар ойындарға тәуелділік) және суицидтік көңіл-күй секілді күрделі әлеуметтік мәселелерге қарсы кешенді іс-шаралар жүзеге асырылуда.
Бұл бағыттағы жұмыстардың басты мақсаты – азаматтардың ақпараттық және психологиялық қауіпсіздігін қамтамасыз ету, алаяқтықтың алдын алу және тұрғындардың санасын теріс әсерлерден қорғау.
Атқарылып жатқан негізгі шаралар мыналар:
-
Жалған ақпараттың таралуына қарсы күрес: әлеуметтік желілер мен мессенджерлерде таралатын жалған мәліметтерді анықтау, тексерілген дереккөздермен жұмыс істеу мәдениетін қалыптастыру бойынша түсіндіру жұмыстары жүргізілуде;
-
Қаржылық пирамидалар мен интернет-алаяқтықтың алдын алу: тұрғындарға алаяқтық схемалардың белгілері түсіндіріліп, күдікті инвестициялық жобалардан аулақ болуға шақыратын брошюралар, бейнероликтер мен ақпараттық жадынамалар таратылып жатыр;
-
Лудоманияға қарсы іс-қимыл: жасөспірімдер мен жастар арасында құмар ойындардың зияны жөнінде түсіндіру сабақтары, кездесулер мен тренингтер ұйымдастырылуда. Мектептер мен колледждерде арнайы тақырыптық әңгімелесу сағаттары өткізілуде;
-
Суицидтік көңіл-күйдің алдын алу: психолог мамандармен бірлесіп, жастар мен қоғамның осал топтары арасында психологиялық қолдау көрсететін іс-шаралар жүргізіліп, «сенім телефондары» мен көмек көрсету орталықтарының байланыс нөмірлері кеңінен насихатталуда;
-
Ақпараттық-насихат топтарының жұмысы: жергілікті әкімдіктер, ішкі істер және білім беру мекемелерімен бірлесе отырып, түсіндіру жұмыстары аудандық деңгейде де жүйелі ұйымдастырылуда.
Құрметті тұрғындар!
Сананы улайтын жалған ақпаратқа бой алдырмау, күмәнді инвестициялық жобаларға сенбеу, құмар ойындарға әуестенбеу және қоғамда белең алып отырған жағымсыз құбылыстардың алдын алуда әр азаматтың жеке жауапкершілігі маңызды.
Егер сіз немесе жақындарыңыз осындай жағдайларға тап болсаңыздар, дер кезінде құзырлы органдарға немесе сенімді мекемелерге хабарласуларыңызды сұраймыз.
