Бүгінгі таңда «қаржы» мен «құқық» ұғымдары тек белгілі бір сала мамандары үшін ғана маңызды емес. Бұл – әрбір азаматтың күнделікті өміріне тікелей қатысты, ескерусіз қалдырған жағдайда үлкен қиындықтарға алып келетін аса маңызды бағыттар.
Осы мәселені назарға ала отырып, Түркістан облысы, Шардара ауданында тұрғындардың қаржылық және құқықтық сауаттылығын арттыруға бағытталған ашық форматтағы семинар-кездесу ұйымдастырылды. Іс-шараның мақсаты – азаматтарды алаяқтық, заңсыз несиелер, банк шоттарының бұғатталуы секілді күнделікті өмірде жиі кездесетін мәселелер жөнінде ақпараттандыру және олардың шешу жолдарын үйрету.
Семинарға арнайы шақырылған «Қарызсыз қоғам» жобасының Түркістан облысы бойынша үйлестірушісі Жандос Әзімбай қаржылық сауаттылықтың маңыздылығына тоқталып өтті:
– Әрбір азамат өзінің құқықтары мен міндеттерін нақты білуі керек. Бұл – тек заң алдындағы жауапкершілік емес, күнделікті өмірде өзіңді қорғаудың бірден-бір жолы. Қаржылық және құқықтық сауаттылық – қауіпсіз әрі саналы өмір сүрудің кепілі, – деді ол.
Сонымен қатар, педагог-психолог Шара Абдирахманова қаржылық қиындықтардың психологиялық салдарына ерекше тоқталды:
– Қаржы тапшылығы адамның психологиялық жағдайына тікелей әсер етеді. Бұл күйзеліс, отбасылық келіспеушіліктер, өз-өзіне деген сенімсіздік және тіпті лудомания сияқты тәуелділікке ұрынуға алып келуі мүмкін. Сондықтан қаржыны ғана емес, эмоцияны басқаруды да үйрену – маңызды дағды, – деді маман.
Кездесу барысында тұрғындар нақты сұрақтарын қойып, мамандардан кәсіби кеңестер алды. Іс-шара соңында қатысушылар осындай пайдалы әрі мазмұнды кездесулердің алдағы уақытта да жиі өткізілуін қалайтындарын жеткізді.
