Қазіргі таңда қоғам алдында тұрған маңызды міндеттердің бірі – кәмелетке толмағандар арасындағы құқықбұзушылықтың және қылмыстың алдын алу. Осы бағытта жастардың құқықтық сауаттылығын арттыру, тәртіпке баулу және заңға бағынышты азамат тәрбиелеу мақсатында Шардара ауданы Ақшеңгелді ауылдық округіне қарасты Ақалтын және Егізқұм жалпы білім беретін мектептерінде ақпараттық-түсіндіру кездесулері өткізілді.
Іс-шара барысында қатысушыларға құқық тәртібін сақтау, қоғамда белгіленген ережелер мен нормаларға бағыну – әр азаматтың басты міндеті екені айтылды. Сонымен қатар, жаман әдеттерден бойды аулақ ұстап, салауатты өмір салтын ұстанудың маңыздылығы ерекше атап өтілді.
Кездесуде құқық бұзған немесе қылмыс жасаған жағдайда заң алдында жауапкершілік қарастырылатыны түсіндірілді. Мектеп оқушыларына нақты мысалдар келтіріліп, заң бұзушылықтың салдары мен оның өмірге әсері жөнінде кеңінен ақпарат берілді.
Бұл кездесулер жастар арасында құқықтық мәдениетті қалыптастыруға, жауапкершілік сезімін оятуға және келешекке саналы қадам жасауға бағытталған маңызды қадам болды.
