Арыс қаласының барлық білім ордаларында «Соңғы қоңырау» салтанатты шарасы өтті. Түлектер үшін толқыныс пен қуанышқа толы бұл ерекше күнде қала әкімі Қайсар Маңқараев М.Әуезов атындағы жалпы орта мектептің соңғы қоңырау мерекесіне арнайы қатысып, түлектерге ақ жол тіледі.
Ашық аспан астында өткен шараға мектеп ұжымы, оқушылар мен ата-аналар, қадірменді қонақтар жиналды. Қала басшысы өз сөзінде үлкен өмірге аяқ басқалы тұрған түлектерге жүрекжарды лебізін білдіріп, білімге құштарлықтары мен еңбекқорлықтары үшін алғыс айтты.
– Биыл қала және ауыл мектептерін 1249 түлек тәмамдайды. Оның ішінде 64 оқушы – «Алтын белгіге», ал 159 оқушы – «Үздік аттестатқа» үміткер. Бұл – ұстаздарымыздың тынымсыз еңбегінің, ата-аналардың қолдауы мен оқушылардың табандылығының айқын көрінісі. Еліміздің ертеңі – білімді де саналы жастардың қолында. Сіздер тек Арыстың ғана емес, Тәуелсіз Қазақстанның мақтанышы болыңдар! – деді қала әкімі.
Мерекелік шара барысында үздік оқушылар мен олардың жетекші ұстаздарына қала әкімінің алғыс хаттары табысталып, құрмет көрсетілді. Түлектер өздері 11 жыл білім алған алтын ұя мектебімен қимастықпен қоштасып, ұстаздарына арнаған ән шашуларын тарту етті.
Түркістан облысы әкімінің баспасөз қызметі
