Бүгін Шардара ауданының 60 жылдық мерейтойы қарсаңында «Қазақ аналары – Дәстүрге жол» республикалық қоғамдық бірлестігінің аудандық филиалының ұйымдастыруымен «Ұлттың ұйытқысы – Қазақ аналары» атты аудандық форум өтті.
Іс-шара «Ана мен бала» ескерткішіне гүл шоқтарын қою рәсімімен басталды. Одан кейін ұлттық салт-дәстүрімізді дәріптейтін «Ұлттық киім – ұлттың бейнесі» атты ұлттық киімдер шеруі өтті. Форумның мазмұнды жалғасы ретінде Абай алаңында орналасқан «Құрақ өрнектері – 60» көрмесі көпшілік назарына ұсынылды. Көрме Шардара ауданының 60 жылдығына орайластырылып, «Қасиет» әлеуметтік қызмет көрсету орталығының қолөнершеберлері әзірлеген алпыс метрлік құрақ көрпені таныстырды.
Шараның негізгі бөлімі Шардара аудандық мәдениет сарайында өтті. Ауқымды іс-шараға Шардара ауданы әкімінің орынбасары Бейсенбай Тасболатұлы Туребеков, «Қазақ аналары – Дәстүрге жол» республикалық қоғамдық бірлестігінің Түркістан облыстық филиалының төрайымы Ботакөз Тағайқызы Мошқалова, аудандық ардагерлер кеңесінің төрағасы Тоқсанбай Бердібеков, аудандық ақсақалдар кеңесінің төрағасы Қыстау Інәйұлы Ілесов, Шардара аудандық филиалының төрайымы Бибігүл Тасқұлқызы Көшекеева, аудандық ішкі саясат бөлімінің теолог маманы Асылханқажы Қасымұлы Данияров, сондай-ақ ауданның ақ жаулықты аналары, әлеуметтік, білім және мәдениет саласының өкілдері мен БАҚ қызметкерлері қатысты.
Форум барысында Б.Көшекеева баяндама жасап, бірлестіктің мақсат-міндеттері мен жетістіктері туралы баяндады. Сонымен қатар аудан әкімінің орынбасары Б.Туребеков құттықтау сөз сөйлеп, ұлттық құндылықтарды насихаттауда ерекше белсенділік танытқан аналарды аудан әкімінің алғыс хатымен марапаттады. Ардагерлер кеңесінің төрағасы Т.Бердібеков, ақсақалдар кеңесінің төрағасы Қ.Ілесов, ішкі саясат бөлімінің теологы А.Данияров және «Ақ әжелер» ансамблінің жетекшісі Ж.Муталиева қатысушыларға жүрекжарды тілектерін білдірді.
Форум барысында Ботакөз Тағайқызы Мошқалова мазмұнды баяндама жасап, ұлттық құндылықтарды насихаттауда ерекше белсенділік танытқан ардагерлер мен аналарға алғыс хаттар табыс етті.
Іс-шара аясында «Ақмарал Дауылбай» дизайнерлік сән үйінің ұйымдастыруымен «Ұлттық киім – ұлттың бейнесі» атты сән көрсетілімі өтті. Қазақ аналарының ұлттық киім үлгілері көрермендер назарына ұсынылып, көпшіліктің жоғары бағасын алды.
Жиын соңында аудандық мәдениет сарайының өнерпаздары мерекелік концерт ұсынып, форумға қатысушыларға көтеріңкі көңіл-күй сыйлады.
Бұл шара – қазақ аналарының қоғамдағы рөлін дәріптеу мен ұлттық салт-дәстүрді жаңғыртуға бағытталған маңызды бастамалардың бірі болды. Форум Шардара жұртшылығының рухани өміріне серпін беріп, қоғамдық ұйымдар мен тұрғындар арасындағы байланысты нығайтты.
Шардара ауданы әкімінің баспасөз қызметі
