Түркістандық тұрғын егін шаруашылығына қолайлы құрал ойлап тапты, деп хабарлайды ҚазАқпарат.
Түркістан облысы, Келес ауданындағы Жолбасшы елді мекенінің тұрғыны Ырысдәулет Тәңірбергенов қолмен тұқым егу құрылғысын ойлап тапты. Қолдан құрастырылған құрал он адамның жұмысын атқаруға қауқарлы. Сондықтан, диқандардың уақыты мен шығынын үнемдейді.
«Бұл құрылғы негізінен қырыққабат ұрығын жылыжайға егуге арналған. Біз жақта көпшілік ерте көктемнен қырыққабат егеді. Жұмысқа сұраныс қараша, желтоқсан айларында көбейеді. Құрылғымыз өте ыңғайлы. Бір дәннен артық жібермейді. Қазір қолданыста 4 түрі бар, ауқымына қарай тапсырыс қабылдай береміз, –дейді Ырысдәулет Тәңірбергенов.
Шаруа құралдың алғашқысын осыдан 5 жыл бұрын жасап шыққан. Жобасы нәтиже көрсеткен соң жан-жақтан сұраныс түсе бастапты. Әсіресе, егін шаруашылығымен айналысатын Сарыағаш, Мақтаарал, Жетісай аудандарынан тапсырыс беріп, жасататындар көп.
