Маңғыстауда обаға қарсы 13840 адамға екпе салынады. Бұл туралы Маңғыстау облыстық санитариялық-эпидемиологиялық бақылау департаменті мәлім етті, деп хабарлады ҚазАқпарат тілшісі.
Екпе жануарлардан жұғатын аса қауіпті, табиғи ошақты карантиндік жұқпалы ауру — обадан қорғану мақсатында жоспарланып отыр.
«Обаны тасымалдаушылар — бүрге, кеміргіш, тышқан, егеуқұйрық, сарышұнақтар. Яғни, жанасу арқылы, ауа-тамшылары арқылы жұғады. Обаның өкпелік, ішектік, тері-бубондық, септикалық түрлері болады. Вакцинациялауды жоспарлы түрде жасау керек және эпидемиялық көрсетілімдер бойынша бір рет, қайта вакцинациялауды соңғы егуден кейін 12 айдан кейін жасайды,- деді Маңғыстау облыстық санитариялық-эпидемиологиялық бақылау департаментінің бөлім басшысы Айнұр Құлжымырова.
Спикердің айтуынша, екпе жұмыстары сәуір айында басталған. Жалпы обаның алдын алу үшін көктемде және күзде эпиджасақтар шығарылады.
«Осы жылы қыркүйек айына дейін 2 стационарлық және 4 эпидемиологиялық жасақтармен 70,7 мың шаршы шақырым аумақ зерттелді. Ең алдымен елді мекендердің айналасы және басқа да адамдар шоғырланатын жерлер зерттелді. Есепті кезеңде кеміргіштер мен сыртмасылдардан обаның оқшауланған дақылдары болған жоқ, — деді Маңғыстау облыстық обаға қарсы күрес станциясы филиалы басшысының орынбасары Мархабат Төлегенова.
