Шымкентте заңсыз ойын бизнесін жүргізген азамат ұсталды. Бұл туралы Шымкент қаласы бойынша қаржы мониторингі агенттігі департаментінің баспасөз қызметі мәлімдеді, деп хабарлайды Stan.kz.
Заңсыз кәсіп иесінен жүйелік блоктар мен мониторлар, ноутбук, ойын терминалдары, рулетка және чек аппараты тәркіленді.
АФМ департаменті “Стоп ойын” жедел-алдын алу іс-шаралары аясында заңсыз ойын бизнесін ұйымдастыру фактісін анықтаған.
“Жүйелік блоктар мен мониторлар, ноутбук, ойын терминалдары, рулетка, чек аппараты және басқа да техника табылып, тәркіленді. Іс сотқа берілді. Сот үкімімен ұйымдастырушы кінәлі деп танылды. Оған 1 жылға бас бостандығын шектеу жазасы тағайындалды”,-деп хабарлады департаменттің баспасөз қызметі.
“Ойын бизнесі туралы” заңы бойынша, казино мен ойын автоматтары залын Қапшағай су қоймасының жағалауында және Ақмола облысының Щучье ауданында жергілікті атқарушы органдар айқындайтын аумақтарда орналастыруға болады.
