Жаңарып жатқан тарихи қала Түркістанда ескі үйлер жетерлік. Алайда ескі үйлерге бүгінде модернизация жасалуда. Десе де Самал ықшам ауданы тұрғындарының бұл іске көңілдері толмайды. Себебі, жөндеу жұмыстары сапасыз, тіпті кей жерлерде тоқтап қалды дейді. Бұл туралы Turkistan телеарнасының жаңалықтар қызметі хабарлады.
Еске сала кетейік, осыған дейін жөндеу жұмыстарын көрген бірінші ықшам ауданының 32-ші көпқабатты үйдің шатыры дауылдан ұшып кеткен еді. Бұл туралы толығырақ әріптесім Дина Айтбекова жалғастырады.
Қазіргі таңда қаламызда 127 көпқабатты ескі үй бар. Олардың басым көпшілігі 2 және 5 қабатты тұрғын үйлер. Оның ішінде 46 көпқабатты тұрғын үйге күрделі жөндеу жұмыстары жүргізіліп жатса, 23 екі қабатты тұрғын үйдің жөндеу жұмыстарын жүргізу жоспарлануда. Ал тұрғындардың басым көпшілігі күрделі жөндеу жұмыстарының аяқсыз қалғанына наразы. Жауапты мамандар жөндеу жұмыстарының толық аяқталуын бақылауға алса, тоқтап қалған жұмыстарды қайта жандандырса деп қалауларын білдірді.
ГҮЛЖАН ЕМБЕРДИЕВА, ҚАЛА ТҰРҒЫНЫ:
— Мен осы 35 домда 1997 жылдан бері тұрып келе жатырмын. Бірақ жөндеу жұмысын көрген емеспіз. Былтыр келіп, осы Самал ықшам ауданында жиналыс жасап кеткен болатын. Келгенде берген уәдесі, 1-ден 5-ке дейін қабырғалар қырылып, есік, терезелер жаңартылады, шатыр жөнделеді, үйдің алдына жөндеу жұмыстары жөнделеді деген еді. Бұл жерде енді шатыр жөнделді оған рақмет, домның сырты көріп тұрғандарыңыздай сыланып, боялды. Бірақ ішіне жөндеу жұмыстары әлі жүргізілген жоқ. Қырғанда да әр жерінен қырды. Бұл нәрсеге тұрғындар шағымданды. Мына жерде қалдықтары қалды.
НАПИСА МЫРЗАХАНҚЫЗЫ, ҚАЛА ТҰРҒЫНЫ:
— Мен бұл үйде 1988 жылдан бері тұрып келе жатырмын. Соңғы жөндеу жұмыстары бойынша шатырды жөндеп беріп кетті. Көңіліміз толмайтыны жөндеу жұмыстары соңына дейін жеткізіп, аяқтамай кетті. Қырған жұмыстарын аяқтап, есік қойып берсе деген тілегіміз бар. 88 жылдан бері бірде бір есік көрген емеспін.
Қаламыздағы көпқабатты ескі тұрғын үйлер 1970 жылдан бері келе жатыр. Сонау Кеңес заманында салынған үйлер сүрілмей оларға жөндеу жұмыстары жүргізіліп келеді.
ТАЛҒАТ ҮСЕНБАЕВ, ТҰРҒЫН ҮЙ ҚАТЫНАСТАРЫ ЖӘНЕ ТҰРҒЫН ҮЙ ИНСПЕКЦИЯСЫ БӨЛІМІ МЕМЛЕКЕТТІК МЕКЕМЕСІНІҢ БАСШЫСЫ:
— Қалада «Сырғақ батыр», «Төреқұлов», «Тоқаш Бокин», «Бекзат мөлтек ауданы», «Төле бәйтек» және «Абай көшесінде», «Есенберлин» көшелерінде ескі үйлер орналасқан. Дәл қазір бірінші мөлтек ауданында жөндеу жұмыстары жүргізіліп жатыр. Оның ішінде сырқы қабырғалары, шатыры мен кіре беріс аумақтары жөнделуде. Шатыр жұмыстары бойынша жыл басынан бергі жоспар орындалды. Ал сыртқы аумақтағы жзұмыстар әлі де жүргізуде.
Тоқтап қалған жөндеу жұмыстарына келсек, мердігер компаниялардың өз есебінен жұмсаған қаржының жетіспеуінен жұмыстар кідірген. Ал қазір қаржы игерілуіне байланысты жұмыстар Шілде айының ортасында қайта жанданатын болады. Жөндеу жұмыстарын толық Тамыз айының соңына дейін бітіру жоспарлануда»,-дейді жауапты мамандар.
Дина Айтбекова
