Елімізде алаяқтықтың жаңа түрі пайда болды. Бұл жолы қаскөйлер өзін «Nur Otan» партиясының қызметкерлері ретінде таныстырып, 960 000 теңге көлемінде төлем рәсімдеуді ұсынуда деп хабарлайды Stopfake.kz.
Төтенше жағдай кезінде мемлекеттен 42500 теңге алғандар ірі төлем алуға үміткер бола алады. Миллион теңгеге жуық жәрдемақыны «рәсімдеу» үшін алаяқтар абоненттерден 1414 қысқа нөмірінен келген СМС-хабарламаларға жіберілген кодты айтуды сұрайды.
«Ұлттық ақпараттық технологиялар» АҚ бұл нөмірден әлеуметтік төлемдерді алу үшін қандай да бір ақпаратты тарату туралы хабарламаны жоққа шығарды.
«Құрметті пайдаланушылар, «Ұлттық ақпараттық технологиялар» АҚ әлеуметтік төлемдерді алу үшін 1414 нөмірінен хабарлама жіберілмейтінін мәлімдейді. Сонымен қатар, алаяқтарға ешқандай ақпарат бермеуді және 1414-тен келген кодтарды үшінші тұлғаларға хабарламауды сұраймыз», – дейді «Ұлттық ақпараттық технологиялар» АҚ баспасөз қызметі.
Алаяқтардың мұндай әрекеттері әлеуметтік инженерия деп аталады. Бұл адамның психологиясын ескере отырып, жеке деректерін заңсыз иемдену тәсілі. Мысалы, олар телефоннан өздерін банк қызметкерлері ретінде таныстырып, абоненттен ақша салымдарының қауіпсіздігін қамтамасыз ету үшін құпия деректерді айтуды талап етеді.
Мұндай алаяқтықтан қалай қорғану керектігін KZ-cert Компьютерлік инциденттерге әрекет ету қызметінің ресми сайтынан білуге болады.
