Түркістан облысында биыл 87 елдімекенннің әкімі сайланды. Оның 68-інде тұрғындар өз басшыларын тікелей таңдады. Қалғанында жанама сайлау өткен.
Ел Президенті Қасым-Жомарт Тоқаевтың бастамасымен жүзеге асырылған науқанға қатысу үшін жалпы 236 кандидат тіркеліпті. Оның 139-ы өзін-өзі ұсынса, қалғаны – еліміздегі саяси партиялардың өкілдері. Бірінші рет сайланған әкімдердің саны 33 болса, орнына қайта жайғасқаны 35 азамат. Сайлауда 1 ғана әйел азаматының бағы оза шауыпты. Ұлттардың үлесі бойынша 83 қазақ, 4 азамат өзбек этносынан. Сайлауды жарамсыз деп тану және қайта өткізу туралы мәселе болмаған. Әйткенмен, бірқатар өңірлерде кемшіліктер орын алған.
Әлібек Өмірәлиев, облыстық аумақтық сайлау комиссиясының төрағасы:
«Алатау ауылдық округінде Ажибаев, Абдукаимов есімді азаматтар өзін-өзі ұсынған. Алайда, аудандық полиция басқармасы үміткер жақтастарының қолы жарамсыз деп танып, сайлау комиссиясына ұсынған. Кандидаттар сотқа арызданған тұста полиция қызметкерлері бұлтарпас айғақ көрсете алмады. Тиісінше, олар қайта кандидат ретінде тіркеліп сайлауға қатысты».
Жалпы жарты жыл ішінде Қазақстанда ауыл әкімдерінің үштен бір бөлігі жаңарған. Яғни 864 әкім сайланыпты. Ел бойынша сайлаушылардың қатысу деңгейі 87,5 пайыз. Бұл ауыл тұрғындарының белсенділігін және бастаманы қолдайтындықтарын көрсетеді.
