1993 жыл 5 қараша. Дәл осы күні Елбасы Нұрсұлтан Назарбаевтың қаулысымен «Болашақ» бағдарламасы іске қосылды. Содан бері түлектер түрлі салада жетістікке жетіп жүр. Олардың арасында 12 вице-министр және түрлі деңгейдегі әкімдер бар. Ал биыл аталған бағдарлама бойынша грант 569 қазақстандыққа тағайындалды. Оның 163-і магистрант атанса, 4 адам үздік оқу орнының докторантурасына түсті.
Ерасыл Төлебаев 17 жасында «Болашақ» халықаралық бағдарламасының грантын иемденген. Ең алғаш Малазия мемлекетінде 2 жыл оқыды. Шекара астым деп тоқтап қалмады. Ұлыбританияға барып, 4 жыл тәжірибесін арттырды. Түрлі салада топ жарып жүрген ол бүгінде облыстың жаңғыруына өзіндік үлесін қосып жүр.
Ерасыл Төлебаев, облыстық жастар ресурстық орталығының директоры:
«Кім болатынымды білген жоқпын. Бастысы елге қызмет ету болды. Сондықтан нақты жоспар болған жоқ. Бірақ алған тәжірибем, елімнің маған құйған ақшасын ақтау және елге қызмет ету деген мақсатпен келдім. Түркістанның көркеюіне атсалысқан кішткентай болсын еңбегім бар деп ойлаймын».
Осы жылы 569 қазақ жастары өзге елде білімін жетілдіреді. Оның 220-сы АҚШ, 136-сы Ұлыбританияға барса, Ресей Федерациясына – 57, Австралияға 13, Германияға – 14, Жапония мемлекетіне 3 түлек аттанады. Биыл «Тағылымдама» бағдарламасы бойынша 37 стипендиат білім алады. Солардың бірі – Асхат Сәдібеков. Ол АҚШ-тың Нью-Йорк қаласына деректі фильм жасау технологиясы мамандығы бойынша грант0f ие болды
Асхат Сәдібеков, грант иегері:
«Шет елде білім алғысы келіп жүрген азаматтарға айтарым ешқандай қиналмай, ойланбай тапсыруға болады. Себебі барлығы ашық, құжат жүктеу мәселесі де цифрлық деңгейге көтерілген. Алдағы уақытта сол жерден жиған білімімді осында алып келіп, білгенімді шәкірттеріме үйретемін».
Халықаралық бағдарлама орталығының мәліметінше, «Болашақ» түлектерінің 76 пайызы Нұр-Сұлтан мен Алматы қалаларында қызмет етеді. Қалған 24 пайызы еліміздің басқа аймақтарында. Ал түлектердің 40 пайыздан астамы экономика саласында. 20 пайызы білім және ғылым бағытын таңдайтын көрінеді.
