Кентаулық 460 тұрғын 13 жылдан бері өз жеріне үй сала алмай жүр. Себебі базбіреулер қазып, қоқысқа толтырып кеткен. «Әкімдік қазығы қағылмаған жерлерін қалпына келтіріп берсін немесе басқа жақтан жер бөлінсін» деп талап етуде тұрғындар. Ал бұған жауапты мекемелер не дейді? Тілші тарқатады.
Бегімше Байқонысова жер телімін 2008 жылы сатып алған. Содан бері 13 жылда әлі үй сала алмай жүр. Бұл жерге ол кенжесінің еншісін беріп, соларды өз алдына отау қылып шығармақ болған. Сөйтсе, 10 соттық жерін әлдекімдер қазып, қала берді ішін қоқысқа толтырып кеткен. Кезінде үй көтермек болғанда, қала әкімшілігі шағынауданға су, жарық, газ, жол салынбай тырп ете алмайсыздар деген.
Бегімше Байқонысова, қала тұрғыны:
«Үй саламыз деп алған жекеменшік жеріміз. Алайда әлі күнге қолдана алмай отырмыз. Жатыр міне, қоқысқа толып. Егерде бұл карьер болса, онда басқа жақтан жер берсін»
Жалғыз Байқонысова болса мейлі ғой, онымен мұңдас 460 адам бар мұнда. Олардың бәрінің сұрайтыны бір ғана нәрсе – ең болмағанда жерімізді белгілеп, қазық қағып берсе дейді. Қараусыз қалғандықтан баз біреудің меншігіне өтіп кетпес үшін, басқалары да үй салуға бекіне алмай отыр. Қала әкімдігінің табалдырығын қанша тоздырса да, мәселе міз бақпай тұр.
Алмас Ахметов, қала тұрғыны:
«Біздің жерімізге малдың қиы, құрылыс материалдарын, бардюлреді тастап толтырып кеткен. Одан қалса, күл төгеді. Биылдың өзінде Кентау әкіміне көршілермен 4 рет бардық. Мүлдем қабылдамайды»
Мәселенің мән-жайын анықтамақ болып, қала әкімдігіне де келдік. Жер телімдерінің басына барып көрейік деген қала орынбасарынан мынандай жауап алдық.
Қуаныш Искаков, қала әкімінің орынбасары:
«Бүгінгі таңда электр желілері мен су құбырлары тартылған. Сондай-ақ, жол мен кәріз жүйесіне республикалық бюджеттен қаржы сұрап өтініш жаздық. Мердігер компания да белгіленген. Қаражат 2022 жылдың соңы мен 2023 жылдың басында бөлініп, құрылыс жұмыстары аяқталады. Сосын шекаралар белгіленіп, үй көтеруге рұқсат беріледі»
Түйін: Кентаулық 460 тұрғынның жағдайы міне осындай. 2022 жылдың соңында шешіліп, бюджеттен қаржы бөлінеді дейді жауаптылар. Сосын ғана жер иелері қоныстарына қамданса болады екен. Ал әзірге «инфрақұрылым қалыптаспай, үй салуға да рұқсат жоқ», — деп кесіп айтты жауаптылар.
