Өзбекстанда «Ташкент жастар форумы-2021» іс-шарасы өтуде. Форумға өзбек елінің түкпір-түкпірінен келген 15 мың белсенді жас пен елордамыз Нұр-Сұлтан мен түркі елдерінің рухани астанасы Түркістаннан арнайы делегация қатысуда. Бастамашыл жастардың басқосуына Ташкент шаһарының әкімдігі мұрындық болып отыр. Форумның мақсаты- екі елдің белсенді, іскер жастарының басын қосып, олардың идеялары мен бастамаларына қолдау көрсету. Іс-шара соңында үздік деп танылған 100 стартап қаржылық қолдауға ие болмақ.
Қазақстан мен Өзбекстан жастарының басын қосқан форумды Ташкент қаласының әкімі Джахонгир Артыкходжаев ашып берді. Сонымен қатар ашылу салтанатына өзбек елінің вице-премьері, Туризм және спорт министрі Азиз Абдухакимов, Мәдениет министрі Озодбек Назарбеков пен басқа да ведомство басшылары қатысты.
Джахонгир Артыкходжаев, Ташкент қаласының әкімі:
«Президентіміздің Қазақстанға сапары барысында Нұр-сұлтан қаласының әкімімен келісім жасалды. Келісімге сәйкес Қазақстан Үкіметі осы форумға қатысу үшін 31 белсенді жасты жіберіп отыр. Барлық қатысушыларға сәттілік тілеймін!»
Түркістандық жастардан құралған топты облыстық Жастар ресурстық орталығының басшысы Ерасыл Толебаев бастап барды. Делегаттар қатарында Токио Олимпиадасының қола жүлдегері, әлем чемпионы Сәкен Бибосынов, опера әншісі Мөлдір Бақытжанқызы бар. Сондай-ақ біздің телеарнаның журналистері Рысгүл Досжан мен Дамира Сайлау да қатысуда.
Ерасыл Толебаев Түркістан облыстық жастар ресурстық орталығының басшысы:
«Форумда түрлі сала министрлерімен ашық диалогтар ұйымдастырылуда, онда жастар заманауи білім беру, IT-технологиялар, денсаулық сақтау, қаржылық сауаттылықты арттыру, бизнес және экологиялық мәселелер бойынша ойларын ортаға салып, пікір алмасуда».
Томарис Махсетова, форумға қатысушы:
«Форумға қатысушылар танымал дизайнерлер мен кәсіпкерлердің шеберлік сабақтарына қатысуға, жазушылармен, Олимпиада чемпиондарымен, сондай-ақ Спорт және кино жұлдыздарымен кездесуге мүмкіндік алады. Сондай-ақ жастар үшін сән көрсетілімдері, Өзбекстан ұлттық симфониялық оркестрінің концерті өткізілмек».
