Алдағы 10 жылда Қазақстан электр қуаты тапшылығымен ұшырасуы мүмкін. Бұдан бөлек, климаттың өзгеру қаупі тағы бар. Қазірдің өзінде әлемдік табиғат апаттар тұтас экожүйеге кері әсер етуде. Төрткүл дүниенің назары ауған бұл мәселе Түркістанда да талқыланды. Климаттың жылыну салдары мен оның алдын алу кезеңдері жайында тілші материалында.
2021 жылы дала орман өрттері рекордық көрсеткішке жетті. Салдары жаһандық жылынуға алып келіп, табиғат күрт өзгеріске түсті. Төрткүл дүниені алаңдатқан жағдай біздің елімізді айналып өтпесі хақ. Өз тұрғысында кері әсерін тигізуі мүмкін. Бұл ретте табиғат жанашырлары бас қосып, Түркістанда арнайы форум өткізді. Онда Қазақстанның экологиялық ұйымдарының қауымдастығы төрайымы Әлия Назарбаева сөз бастап, сын-қатерді азайтуда нақты іс-шаралар пакетін әзірлеу керектігін айтты. Париж келісімі шеңберінде алынған міндеттемелерді тереңдетіп, ұлттық деңгейдегі жағдайға өз үлесімізді қосуға шақырды.
Әлия НАЗАРБАЕВА, «Қазақстанның экологиялық ұйымдарының қауымдастығы» ЗТБ төралқа төрайымы:
«Климаттың жаһандық өзгеруінің табалдырығы қайтып келмейтін деңгейге жетті. Бүкіл ел тұрғынының өмір сүруі үшін апатты жағдай. Температура көтерілуі мүмкін, жауын-шашын біркелкі болмайды, құрғақшылық пен су тасқыны болады, бұл бірінші кезекте Орталық Азия аймағындағы елдерге әсер етеді. Егер оқиғалар осы сценарий бойынша дамитын болса, барша мемлекеттерде алдын ала болжанбайтын көші-қон процестері бар әлеуметтік жарылыстар болады. Ұжымдық амбициясыз бұл мәселелерді шешу мүмкін емес»
Жиынға қатысқан еліміздің Бас экологы Қазақстан үшін климаттың өзгеруіне күрес басым бағыт болып табылатынын атап өтті.
Серікқали БРЕКЕШЕВ, ҚР Экология, геология және табиғи ресурстар министрі:
«Париж климаттық келісіміне қосыла отырып, Қазақстан атмосферадағы парниктік газдардың құрамын төмендету бойынша қойылған мақсаттарға жету үшін бар күш -жігерін жұмсауға уәде берді. Осыған байланысты тиісті инфрақұрылымды құру мен «жасыл» технологиялар нарығын дамытудың шұғыл қажеттілігі туындайды. Аталған мақсатта біз бірқатар заңнамалық құжаттар әзірлеп, жаңартылатын энергия көздерін пайдалануды қолдау туралы заңды қабылдау арқылы институционалдық негіз құрдық»
Бұдан бөлек, форум жұмысына қоғам өкілдері, Қырғызстан, Тәжікстан, Өзбекстан және Қазақстан Парламентінің, Германия елшілігінің, халықаралық ұйымдардың депутаттары, бизнес және экологиялық қоғамдастық өкілдері қатысты. Алқалы жиынға келушілер климаттың жылыну салдарлары мен қатерлері, көміртекті бейтараптықты іске асырудың артықшылықтарын талқылады. Кедергілер мен тосқауылдар мәселелері жайлы сөз қозғап, сондай-ақ «жасыл» жобаларды іске асырудағы табысты тәжірибелерімен бөлісті.
