Бітпей қалған жолдың жыры. Түркістан қаласы «Сауран» шағынауданының тұрғындары төселмей қалған асфальт үшін наразы. Ол көшені бойлай, теміржолға барып тірелуі тиіс болған. Алайда жол құрылысы 2014 жылы тоқтап қалған. Ал тұрғындар жаздыгүні шаңнан, күз-көктемде батпақтан аяқ алып жүре алмайды.
Арғы беті – Ыбырай Дүйсенов, бергі беті Теріскей деп аталатын екі көшенің ортасында қалған жолдың сиқы осы. Өзінің ресми атауы да жоқ. 2014 жылы салына бастаған жол көшені кіреберісінен тоқтап қалған. Әуелде теміржолға дейін төселеді деп уәде берілген, – дейді. Шаңы шығып, шұрқ тесік боп жатқан көшемен автобус та өтпейді,- деп күйінеді тұрғындар.
Оңдыбай Жанысбаев, тұрғын:
«Біріншіден жарық жоқ, екіншіден жол жоқ. Жаңбыр жауғанда жерт батпақ, жазда ақ боран. Алдымыз қыс, ана шұңқырды көрдіңіздер. Жас бала тұрмақ, үлкен адам түсіп кетеді. 8 маршрут жарты жолдан қайтады. Басында теміржолға дейін салынады деген. Енді аяқтамай қалдырып кетті. Облыс орталығы болғанымызға төртінші жылға аяқ басты, бірақ көшелердің сыйқы әлі күнге осы».
Тұйғын Батырбекова, тұрғын:
«Немерелерімізді сабаққа жіберуге де қорқамыз, мына шұңқырлардан. Барлық жерде жол салынып жатыр ғой. Ал біздің жол неге әлі нашар? Жұрт қатарлы жарығымызды жағып, жолымызды жөндеп берсінші».
Тұрғындар мәселенің шешілуін сұрап әкімдікке талай рет барыпты. Бірақ селт еткен жоқ. Сөйтсек, бұл жолды қалалық инфрақұрылым мен жол көлік мекемелері бірлесіп төсеген екен. 2014 жылғы жол картасы бойынша сол көшенің басына дейін асфальтқа салуға ақша бөлініпті.
Арман Оспан, қалалық жолаушылар көлігі және автокөлік жолдары бөлімі басшысы:
«Теміржолға дейін жол ұзарады дегенге келсек, ең бастапқы сметада сол көшенің басына дейін есептелген. Алдағы уақытта ол көшелерге тас төсеу жұмыстары жүргізілді. Ал асфальт төсеу сарқынды судың құрылысы біткен соң ғана асфальт төселеді».
Бүгінде аталған көшелерге кәріз жүйесін жүргізіп жатыр екен. Сондықтан, жауаптылар желтоқсан айының соңына дейін тас төсеп беретін болды. Асфальт салу келесі жылға қалды. Себебі көшелерге кәріз жүйесі орнатылмай, жол төсеу мүмкін емес.
