Алаяқтықты алаяқтықпен жаппақ болды. Облыста субсидиядағы сыбағасынан қағылғандардың ісін ақша беріп шешпек болған. Ең сорақысы делдал болып жүрген күдіктілер экс шенеуніктер. «45 млн теңге берсең жазаланбайсың» деп таныстарына сенгендер тергеліп жатыр. Бармақ басты, көз қысты қылмақ болғандар жайын Нұрлан Сұлтанбек баяндайды.
Мына кадрлардан қаржы мониторингінің несиелік серіктестік болған ұйымның кеңсесіне баса көктеп кіргенін байқауға болады. Еске салсақ, қалтасын оңай жолмен қампайтқысы келгендер бюджеттің 380 миллион теңгесін жымқырмақ болған еді. Ал несиенің жалпы сомасы 1 миллиард теңгеден асады.
Дәл осы істі шешіп беремін деп ортаға пысақай алаяқтар күдіктілерден 45 млн теңге сұрап, соңында 18 млн теңге алған. Алаяқтық пен жемқорлыққа жол берген үш экс шенеунік конституция заңынан аттап өтті. Күдіктілер ұсталып, оларға тергеу жұмыстары жүргізілуде
Жандос Кенжебаев, облыс бойынша экономикалық тергеп-тексеру департаментінің тергеу басқармасының басшысы:
«Түркістан облысы бойынша экономикалық тергеп-тексеру өндірісінде ҚР кодексінің 190-бабы 4бөлігі 2 тармағы алаяқтық және ҚР 24- бабы 4 бөлігі, 367-баптың 3-бөлігімен яғни пара бепруге адамды азғыру фактісімен қозғалған іс аяқталып, сотқа жолддану үшін іс прокуратураға жолданды».
Айта кестем, елімізде жемқорлыққа қатысты қылмыстық істің әр үшіншісі пара беруге қатысты. Жыл басынан тіркелген 1,5 мыңдай қылмыстың шамамен 500-ден астамы пара беріп, жазаға тартылғандар. Олардың арасында әртүрлі рұқсат қағаздар алуға, мемлекеттік қызмет пен мемлекеттік сатып алуға қатысты пара ұсынғандар көп. Ең ірі жемқорлық оқиғасы, ауыл шаруашылығы саласында орын алған. Жартысына жуығы субсидияға бөлінген қаражатты жымқыруға қатысты.
Марат Ахметжанов, ҚР Сыбайлас жемқорлыққа қарсы іс-қимыл агенттігінің төрағасы:
«Биыл жемқорлық ісі өткен жылға қарағанда 34 пайызға азайып отыр. Оның өзіндік себептері бар. Біз бүгінде сыбайлас жемқорлықпен күресте үшбуынды жұмыс жүйесіне көштік. Қазір сыбайлас жемқорлық ісі бойынша күдіктіге қатысты барлық процесуалды шешімдер прокурордың келісімінсіз заңды күшіне енбейді».
Осыған дейін ұсталған күдіктілерді қылмыстық жауапкершіліктен босатып беремін деп алдағандардың өзі қос қылмысты мойындарына арқалады. Оларға қатысты қылмыстық іс аяқталып, сотқа жолданған. Дегенмен 18 млн.ды қалтасына баспақ болған үш күдіктінің қай салада жұмыс істейтіні, және аты-жөндері тергеу амалдарына байланысты құпия сақталуда.
