«Жылуға жарымай отырмыз». Түркістандағы «Отырар» ықшамауданы тұрғындары арнамызға осылай хабарласты. Мамандар жылуды қосуға уәде беріп, бірақ істі аяқсыз қалдырған. Бүгінде мұздай пәтерде бүрсең қағып отырған жұрттың жанайқайын Шынар Әділханқызы тыңдап қайтты.
Бастапқыда баспаналы болғанына қатты қуанғандардың қатарында Кәмшат Маруанова да бар. Алайда қазір ол қуаныштың табы да қалмаған, себебі берген үйлерінде бір күні жарық, бір күні су жоқ. Қыл аяғы міне, қақаған суықта жылуға да жарымай отыр. Соның кесірінен балалар ауырып, тіпті алды төсек тартып жатып та қалған.
Кәмшат Маруанова, тұрғын:
«Бәрі бір-біріне сілтейді. Құр босқа бәріміз әбіржігеніміз болмаса, ол жаққа барғаннан еш пайда болмады. Тұрғындардың бірінің мүгедек баласы, енді бірінің жаңа туған жас сәбиі бар. Мынадай суық үйде бір сағат тұру мүмкін емес. Әйтеуір біз ересектер қалың киінсек те, бір амалын табамыз, балалар біз секілді оранып та жата алмайды ғой. Шырқырап жылайды. Оларға «шыда-шыда, әне қосады, міне қосады» деп жұбатып қоямыз. Күнде азанда сондай бір үмітпен оянамыз».
Пәтер иелері кооперативі маманы мәселе жертөледегі кішкентай моторда деп түсіндірді жағдайды. Яғни, бүтін бір үйге жылу айдауға шағын құрылғының шамасы жетпей жатса керек. Ал тиісті мердігер мекеме басқаша уәж айтуда.
Гүлзада Әбішова, тұрғын:
«Мотордың тым кішкентайын қойып кеткенсіздер. Оның күші жетпей тұр үйді жылытуға. Енді бүгін келіп, көресіздер ме? Әлде біз осылай жаурап-жасынап отыра береміз бе?»
Мердігер мекеме:
«Айта береді мотор кішкентай деп. Жазуының барлығы стандартқа сай. Жылуды болмашы ғана беріп жатыр өздері. Баратын нақты күнді айта алмаймын. Бүгін-ертең деп отырмыз».
Сәрсенбай Дүйсенов, пәтер иелері кооперативінің өкілі:
«Қазір қалай шешіледі, солай келеді. Бүгіннен қалмаймыз. Ауыстырамыз, әкімшілік сонымен айналысып жатыр».
Осылайша, мамандар жауабын «бүгін-ертең шешеміз», – деп қысқа қайырды. Ал тұрғындар нәтиже болмаса, «базынамызды әкімдікке барып айтамыз» деп оқталып отыр.
