Түркістан облысында 2000-нан астам оқушы карантинге жіберілді. Себебі, оқу жылы басталмай жатып 38 мұғалім мен 148 оқушы індет жұқтырған.
Соңғы күндері бір емес, бірнеше сайтқа осындай ақпарат шыққан еді. Облыстық адами әлеуетті дамыту басқармасы мұны жоққа шығарып отыр. Әйтсе де, қаладағы Қ.Ясауи атындағы Халықаралық қазақ-түрік университетінің білім алушылары онлайн форматқа көшті. Қазіргі таңда мұнда 12 факультет, 10 мыңнан астам білім алушы бар.
Ардақ БОСТАНОВА, Қ.А. Ясауи атындағы Халықаралық Қазақ-Түрік университеті академиялық департамент директоры:
“Аралас форматта оқуды ұйымдастырдық. Аралас формат дегеніміз – онлайн формат. Ал практика лаборатория сабақтар бізде офлайн немесе контакт түрде болады. Бірақ бірінші курстар мен екінші курстар толық онлайн форматта жалғастыруда. Екінші курстағы медицина факультеті, инженерия, стоматология факультеті осы үш факультеттің студенттері бізде аралас форматта білім алуда”.
Білім бөлімінің мәліметінше, өңірде 26 оқушы мен 20 мұғалімнен індеттің белгілері анықталған. Сондай ақ, олармен байланыста болған 566 бала онлайн оқуға көшкен. Бүгінде облыстағы 934 білім беру мекемесінің барлығы дерлік Ashyq жүйесіне енгізілген.
