Шымкентте күйік шалған, түрлі дене жарақатын алып, ауруханаға түскен науқас балалар саны көбейген, деп хабарлайды ҚазАқпарат.
Өткен жылы қалалық клиникалық балалар ауруханасына дене жарақатын алған 14 987 бала қаралса, биыл 23 576 бала медициналық көмекке жүгінген. Ал күйік шалған балалар саны өткен жылмен салыстырғанда 200-ге артық.
Аталған аурухананың бөлім меңгерушісі Болат Нұсқабаевтың сөзінше, жалпы биыл жеткіншектер арасында барлық жарақат түрі жиілеген.
«Оның бір себебі карантинге байланысты деп ойлаймыз. Мәселен, былтыр балалардың мектептегі уақытында алған жарақаты 605 болса, биыл жыл басынан бері 1993 бала білім ошағында жүріп, ауруханаға түсті», – деді дәрігер.
Мамандардың айтуынша, 6 айдан 3 жасқа дейін балалардың басым бөлігі ыстық суға күйіп қалады, ал одан ересектеу балалардың ойнап жүріп отқа күйіп қалатын жағдайлары көптеп кездеседі.
Ақ халаттылар оқыс оқиғаға тап болған кезде өздігінен ем қабылдамай, бірден медицина мамандарына жүгіну керек екенін ескертеді.
