Лаңкестер қаңтар оқиғасына кемінде 2 жыл дайындалған. Белгілі заңгер Айман Омарова осылай дейді. Бүгінгі мәжілістің жалпы отырысына қатысқан азаматтық қоғам белсенділері, құзырлы орган басшылары 2 ай бойы жүргізілген тергеу жұмыстарының барысын баяндады
Мәжілістің бүгінгі отырысы бұрынғыдан өзгерек болды. Ерекшелігі сонда, Құзырлы орган басшылары,азаматтық қоғам өкілдері қаңтар оқиғасы бойынша 2 ай көлемінде жүргізілген тексерулердің жай-жапсарын халық қалаулыларының алдында баяндады. Мінберге кезек-кезегімен шыққан олар біраз шындықтың бетін ашты. Жиында мәлім болған ақпараттың бірі төңкеріске кемінде 2 жыл дайындалған. Белгілі заңгер Айман Омарова осылай дейді.
Айман Омарова – заңгер:
«Бүгін оқиғаның алғышарттары, себептері, сондай-ақ біздің пікірімізше, қаңтар оқиғасы кезеңінде жасалған қылмыстық құқық бұзушылықтардың құрамына тоқталғым келіп отыр. Қаңтар оқиғасына кем дегенде екі жыл дайындалған. Дегенмен, террористік ұяшықтардың бар екендігі туралы ақпарат одан да ертерек шықты. Көп адамдар барлығы бейбіт митингтен басталды деген жаңсақ пікірде. Шын мәнінде, барлығы оқиғаға ақпараттық дайындықтан, одан біршама ертерек уақытта басталған».
Қаңтар оқиғасы кезінде қаза тапқандардың саны 230 адамға жетті. Басым бөлігі, яғни, 139 адам Алматы қаласында бақилық болған. Оның 20-сы жазықсыз оққа ұшқан. Тәртіп орнату кезінде 86 адамның көзі жойылған. Сол кезеңде 1,5 мыңнан астам мемлекеттік және коммерциялық ғимаратқа залал келтірілді.
Марат Ахметжанов – ҚР Ішкі істер министрі:
«Шұғыл түрде азаматтар мен қызметкерлердің денсаулығын сақтау мақсатында жаппай тәртіпсіздікті тоқтату қажет болды. Тек осы сағаттан бастап полиция қызметкерлері адамның өміріне қауіп төндірмейтін арнайы құралдармен жабдықталды. Алайда, бүлікшілер бұнымен тоқтаған жоқ. Олар қару-жарақ дүкендеріне, полиция бөлімдеріне, басқа да мемлекеттік органдарға шабуыл жасады. 2 800-ден астам қару-жарақ пен оқ-дәрілер ұрланды».
Депутаттар да еркін көсілуге тырысып бақты. Өткір сөздерімен көзге түскендердің бірі Азамат Әбілдаев. Ол Қазақстанның күштік құрылымдарын сынға алды. Жүз мыңдаған сарбаздың көрші елдерден жеткен бар болғаны 2 мың әскердің бетіне қарап қалғанына қапаланды.
Азамат Әбілдаев – ҚР Парламенті мәжілісінің депутаты:
«ОДКБ 2000 әскері келген кезде біз соларға өзіміздің обектілерді күзетуге бердікте содан кейін антитеррорлық операция басталды. Мен бірнеше жерден осыны естідім. Сонда Қазақстанда МВД, армия 250мың-300 мыңға жуық, сонда біз 2000 ОДКБ-ның әскерін күтіп отырдық па келген кезде. Или айтады ғой үлкен ағамыздың или сол кісіден көмектіні или отмасканы күттік пе? Мен сол Мәскеуде отырғанды айтып отрымын. Қаңтар оқиғасын соңғы 2-3 айда қатты дайындалғанын бәрі біледі. Комитеттің жанағы сигналдың брлығы келіп жатқан, значит қай күні ,қай сағатта басталатынын бәрі білген. Бүгінгі күні әлі күнге дейін соларға біз по факту терроризм әлі қолданған жоқпыз. Әлі күнге дейін ол жердегі тағы бір орынбасарын ұстаған жоқпыз».
Мәжілісмен қызды-қыздыға беріліп, сатылғыш басшылар жайлы сөз қозғап, асыра сілтеп жіберсе керек, микрофоны әп-сәтті сөне қалды.
Түйіндер болсақ, қазір барлық органдарда 700 ден астам қамауда отыр. Олардың арасында ат шулы Арман Жұмагелдиев те бар. Тағы 14 қаруласы да абақтыда. Қасіретті қаңтарға қатысты тергеу жұмыстары әлі де жалғасуда.
