Түркістан облысында жаңа оқу жылындағы оқу процесі дәстүрлі форматта өткізіледі,-деп мәлімдеді облыс әкімінің орынбасары Сәкен Қалқаманов. Қазіргі таңда осыған байланысты тиісті жұмыстар атқарылуда.
-«Барлық оқу орындарында санитарлық нормалардың сақталуы ерекше назарға алынды. Атап айтсақ, білім ордалары қажетті дезинфекциялық құрал-жабдықтармен қамтамасыз етілді, мекемелер «Ashyg» жүйесіне қосылды, сондай-ақ, ұстаздардың 85 %-дан астамы, техникалық қызметкерлердің 96 % вакцина салдырды. Сәкен Амангелдіұлының айтуы бойынша, бұл көрсеткіш жыл соңына дейін 100%-ға жетеді.
Бұдан бөлек, жаңа оқу жылында оқушыларға бірыңғай мектеп формасын кию талап етілмейді. Алайда, мектеп формасы класикалық үлгіге сай болуы тиіс.
Жаңа оқу жылына жалпы саны 2 млн. 250 мың дана оқулық сатып алуға 4,8 млрд. теңге қаржы бөлінген. Бүгінде баспаханалармен оқулықтарды сатып алу және тасымал бойынша келісім-шарт жасалды. Оқу құралдарын мектептерге жеткізу жұмыстары 25 тамызда толығымен аяқталады. Жаңа оқу жылында 927 күндізгі орта білім беру ұйымында 516 740 оқушы оқиды деп күтілуде. Биыл ата-аналардың өтінішімен 47 266 бала 1 сыныпқа қабылданды.
Айта кетейік, биыл Түркістан облысы бойынша жалпы 78 мектептің құрылысы жүруде. Оның 70-і облыстық бюджеттен, 8-і «Ауыл-Ел бесігі» жобасымен іске асырылуда. Бұдан бөлек, Түркістан қаласында 720 орындық Назарбаев Зияткерлік мектебі салынуда.
Естеріңізге сала кетсек, облыста 6 апатты және 4 үш ауысымды мектеп бар. Биыл 2 апатты және 1 үш ауысымды мектептің мәселесі шешілсе, қалған мектептердің мәселесін 2023 жылға қарай шешу жоспарланған.
