Түркістан облысындағы Қазығұрт ауданында тағы да төтенше жағдай. Бұл жолы толассыз жауған жаңбырдың соңы селге айналып, аудан орталығында орналасқан 50-ден аса үйді басып қалған. Қуантарлығы құтқарушылар дер кезінде әрекерт етіп, адам мен мал шығынының алдын алды. Мәселенің мән-жайын оқиға орынында болған тілшіміз тарқатады
Сенбі, сағат түскі бір. Мұндай көкнөсерді қазығұрттықтар көптен көрмеген. Бар болғаны 40 минут жауды. Бірақ, салған лаңы көл-көсір.
Нөсердің арты алапат ағысқа ұласты. Жоғарыдан төмен аққан су өзен сияқты. Еңістегі үйлерге лезде су кірді. Үй иелері тек ойбайлап сыртқа қашып қана үлгірген. Әйтеуір өз бастарын аман алып қалғанына қуанады.
Надежда – Қазығұрт ауылының тұрғыны:
«Жаңбыр суы жоғарыдан өзен секілді ақты. Ал үйдің ішіндегі су тізеге дейін жетеді. Киімдерімізбен азық-түлігіміз жарамсыз күйге түсті. Үйдегі тауықтарымыз бен мысығымызды аман алып қала алмадық».
Зардап шеккен негізінен Қазығұрттың солтүстік шығысындағы үйлер. Кенттің ескі бөлігі болғандықтан мұндағы үйлер ойда орналасқан. Бас аяғы 55 үйдің ауласына су кірсе, 5 баспананың іші де су, тағы 4 уінің тек жертөлесіне дейін жеткен.
Биылғы көктем Қазығұрт үшін жауын-шашынды болып тұр. Осыдан 2 апта бұрын селден мал шығын болса, бұл жолы мал-жан аман. Жергілікті билік өткендегі апаттан сабақ алып, бүгінгі жағдайға дайын болғаны байқалады. Дегенмен, мамандар таулы аймақтағы ауа райының тосын мінезі бір бұл емес деп отыр. Тұрғындар әлде де сақ болғаны жөн. Өткені мамыр айының соңына дейін жауын шашын аз болмайды. Тағы да сел болып жұртты әбігерге салуы әбден мүмкін.
