Жаңа оқу жылы қарсаңында ата-аналар мектеп формасын алу мәселесін көтерді. Түркістан облысы Сарыағаш ауданында әл-ауқаты төмен отбасыларға жыл сайын тегін берілетін киім-кешектің биыл берілмейтіні ата-аналардың ашуына тиді, — деп хабарлайды turkistanzaman Tengrinews.kz тілшісі КТК телеарнасына сілтеме жасап.
Көпбалалы аналар «баланы мектепке дайындауға қалтамыз көтермейді» деп шенеуніктерге келгенімен, олар жауапсыз қайтарған. Мектеп мұғалімдері көпбалалы және жағдайы төмен отбасыларға биыл мектеп формасы берілмейтінін айтқан. Есесіне, ата-аналарға әр балаға «осы киім үлгісімен киіну керек» деп шарт қойып, оның бағасына дейін жазылған прейскурант жіберген.
«Мектепке бірыңғай форма кигізесің. Біз айтқан үлгідегі форманы аласыңдар дейді. Менің ондай алатын жағдайым жоқ, қайдан алам? Төрт балам мектепке барады. Киім ала алмаймын. Есептесең, әрқайсына 50 мыңнан кетеді. Оқу жабдығымен қосқанда 400 мың ақша керек, мен оны қайдан аламын?», — дейді Сарыағаш ауданының тұрғыны Ғазиза Қожабердиева.
