Түркістан: «Мейірім» акциясы бастау алды

Білім күні қарсаңында Түркістан қаласының әкімі Нұрбол Тұрашбековтің бастамасымен «Мейірім» акциясы ұйымдастырылды.
Акция аясында әлеуметтік қолдауға мұқтаж және көп балалы отбасылардың 300 баласына оқу құралдары тапсырылады.
Биыл мектеп табалдырығын аттайтын алғашқы 10 бүлдіршінге оқу құралдарын шаһар басшысы мен ардагерлер жеке табыстады.
Қала басшысы акцияға қатысқан барша демеушілерге ризашылығын білдіре отырып:
— Жаңа оқу жылы қарсаңында өздеріңізбен жүздесіп, жас ұрпақ тәрбиелеудегі еңбектеріңіз үшін Сіздерге және Сіздер арқылы барша ата-аналарға алғысымды жеткізгім келді. Бүлдіршіндерімізді келе жатқан Білім күні мерекесімен шын жүректен құттықтай отырып, білімді және тәрбиелі ұрпақ ретінде ата-ананың қуанышы, еліміздің мақтанышы болуларын тілеймін! — деді.