Қазақстандық боксшы, Түркістанның өрені, 2019 жылғы Азия чемпионы Бек Нұрмағанбет (5-0, 3 КО) Нұр-Сұлтандағы «Көшпенділер шайқасы — 2» кешінде кезекті жекпе-жегін өткізді. Қарсыласы да осал емес еді. «Акула» атты лақап атымен танылған мексикалық Бруно Сандовал болды. Кәсіпқой бокста 21 кездесу өткізіп үлгерген ол жеңіс үшін келгені анық.
Дегенмен Нұрмағанбет қарсыласын бірінші раундта нокаутқа түсірді. Сөйтіп, екінші орта салмақта WBA International тұжырымы бойынша чемпиондық белбеуге ие болды.
Бек Нұрмағамбет кәсіпқой боксқа былтыр жазда ауысқан болатын. Бүгінге дейін бес жекпе-жек өткізіп, үшеуінде нокаутпен, екеуінде ұпай санымен жеңіске жеткен.
Тағы бір ақпарат, жуырда бокстан ҚР Мемлекеттік жаттықтырушысы Бақтияр Артаев Бекке ұсыныс тасталып, ұлттық құрама сапына қабылдануы мүмкін деген болатын. Ал үздіктер биыл Сербияда өтетін әлем чемпионатына қатысады. Бірақ әзірше Бектің құрамаға қабылданған немесе қабылданбағаны, келіскені туралы мәлімет жоқ.
