Түркістанда 2,5 тонна наурыз көже дайындалады

Түркістанда туризм маусымының ашылуына орай, 2 жарым тонна наурыз көже пісіріледі. Осылайша, Қазақстанның «Киннес» рекорды жаңартылмақ. Бұған дейін рекорд Астана қаласына тиесілі еді. Өйткені, елордада екі жыл бұрын 2100 литр наурыз көже дайындалған. Айта кетейік, келушілер туристік маусымның ашылуына байланысты ұлттық дәмнен 19-шы наурызда ауыз тие алады. Сонымен қатар, шаһарда «Түркістан-түркі әлемінің рухани астанасы» атты республикалық туристік форум өтпек. Жиынға Орталық Азия елдерінің туризм саласындағы бизнес өкілдері мен қолөнершілер қатысады. Аталғандардан бөлек, от шоуы, сиқыршылар қойылымы, барабан шоуы және поэзия кештері де ұйымдастырылады.